Vidadi Ömər oğlu OrucovLənkəran Dövlət Universitetinin
Fizika, kimya və biologiya kafedrasının
müdiri, pedaqoji elmlər doktoru, professor
Hörmətli Bəradər müəllim,
Mayın 10-da Azərbaycan mətbuat məkanında özünəməxsus dəst-xətti, prinsipial mövqeyi və peşəkar fəaliyyəti ilə seçilən “Atribut” qəzetinin fəaliyyətə başlamasının 23-cü ildönümü tamam olur. Bu əlamətdar yubiley münasibətilə qəzetin bütün yaradıcı kollektivini, xüsusilə də uzun illər milli mətbuatımızın inkişafına dəyərli töhfələr verən baş redaktor Bəradər müəllimi səmimi-qəlbdən təbrik edir, Sizə möhkəm cansağlığı, yeni yaradıcılıq uğurları və tükənməz fəaliyyət əzmi arzulayırıq.
Müasir informasiya məkanında rəqəmsal medianın sürətlə inkişaf etdiyi, internet portallarının ənənəvi mətbuat üzərində ciddi rəqabət üstünlüyü qazandığı bir dövrdə qəzet nəşrini davam etdirmək yalnız peşə fəaliyyəti deyil, həm də böyük mənəvi məsuliyyət, vətəndaş mövqeyi və milli mətbuat ənənələrinə sədaqət nümunəsidir. “Atribut” qəzeti ötən 23 il ərzində bu çətin, lakin şərəfli yolu ləyaqətlə keçərək oxucu etimadını qazanmış, cəmiyyətin ictimai-siyasi və mənəvi həyatında özünəməxsus yer tutmuşdur.
Qəzet fəaliyyət göstərdiyi illər boyunca ictimai fikrin formalaşdırılmasına, milli-mənəvi dəyərlərin qorunub təbliğ edilməsinə, söz və fikir azadlığının inkişafına mühüm töhfələr vermişdir. “Atribut” yalnız informasiya vasitəsi kimi deyil, həm də milli düşüncənin, vətəndaş mövqeyinin və vətənpərvərlik ruhunun ifadəçisi kimi çıxış etmişdir. Xüsusilə Azərbaycanın taleyüklü dövrlərində — torpaqlarımızın işğal altında qaldığı illərdə xalqımızın haqq səsinin dünya ictimaiyyətinə çatdırılmasında, eləcə də Müzəffər Ali Baş Komandanın rəhbərliyi altında Ordumuzun şanlı Zəfər yürüşü zamanı qəzet daim dövlətçilik mövqeyindən çıxış etmiş, milli həmrəyliyin və vətən sevgisinin təbliğində fəal rol oynamışdır.
“Atribut” qəzetinin yaradıcı heyəti xalqın sevincini öz sevinci, kədərini isə öz kədəri bilmiş, qələmini daim Vətənə, dövlətçiliyə və milli maraqlara xidmət prinsipi əsasında işlətmişdir. Qəzetin səhifələrində xalqımızın qəhrəmanlıq salnaməsi, Qarabağ Zəfərinin qüruru, dövlətimizin uğurları və cəmiyyətimizin mənəvi dəyərləri yüksək peşəkarlıqla əks olunmuşdur. Bu isə, ilk növbədə, sözün məsuliyyətini dərindən dərk edən, peşəsinə vicdanla bağlı yaradıcı və peşəkar kollektivin gərgin əməyinin nəticəsidir.
Əminliklə qeyd etmək olar ki, “Atribut” qəzeti bundan sonra da Azərbaycan mediasında öz nüfuzunu qoruyacaq, milli jurnalistikanın inkişafına, sağlam ictimai düşüncənin formalaşmasına və milli-mənəvi dəyərlərimizin təbliğinə layiqli töhfələr verməyə davam edəcəkdir.
Bir daha “Atribut” qəzetinin bütün əməkdaşlarını və çoxsaylı oxucularını bu əlamətdar yubiley münasibətilə ürəkdən təbrik edir, kollektivə davamlı uğurlar, yeni yaradıcılıq nailiyyətləri və daha böyük zirvələr arzulayırıq.