İbrahim Cəfərov 

 Bitki Mühafizə və Texniki Bitkilər ETİ-nin direktoru, professor

8 Noyabr Azərbaycan xalqının yaddaşına qızıl hərflərlə yazılmış, milli qürurumuzun və sarsılmaz iradəmizin təntənəsinə çevrilmiş əlamətdar bir gündür. Zəfər Günü yalnız hərbi qələbənin qeyd olunduğu tarix deyil, həm də xalqımızın birliyini, dövlətimizin gücünü və Vətənə olan sonsuz sevgisini nümayiş etdirən müqəddəs gündür.

2020-ci ilin 8 noyabrında Şuşanın azad edilməsi Azərbaycanın müasir tarixində yeni bir mərhələnin başlanğıcı oldu. Bu tarixi hadisə 44 günlük Vətən müharibəsində əldə olunan qələbənin ən mühüm rəmzlərindən biri kimi yadda qaldı. Şuşanın azadlığı Azərbaycan xalqının uzun illər davam edən həsrətinə son qoydu, milli ruhumuzu daha da yüksəltdi.

Zəfərimizin arxasında Azərbaycan əsgərinin qəhrəmanlığı, şəhidlərimizin müqəddəs qanı, qazilərimizin fədakarlığı və xalqımızın sarsılmaz həmrəyliyi dayanır. Vətən uğrunda canından keçən qəhrəmanlarımızın xatirəsi hər bir azərbaycanlının qəlbində əbədi yaşayacaq. Onların göstərdiyi igidlik gələcək nəsillər üçün əsl vətənpərvərlik məktəbidir.

Bu möhtəşəm qələbə Azərbaycanın beynəlxalq mövqelərini gücləndirməklə yanaşı, ölkəmizin ərazi bütövlüyü və suverenliyi uğrunda apardığı mübarizənin tarixi nəticəsi oldu. Zəfər Günü bir daha sübut etdi ki, milli birlik, güclü dövlətçilik və xalqın öz məqsədinə inamı ən çətin sınaqlardan belə qalib çıxmağa imkan verir.

Bu gün azad edilmiş torpaqlarımızda həyat yenidən canlanır. Qarabağ və Şərqi Zəngəzurda həyata keçirilən bərpa və quruculuq işləri, doğma yurdlarına qayıdan insanların sevinci Zəfərimizin davam edən təntənəsidir. Qarabağda dalğalanan üçrəngli bayrağımız xalqımızın əzmini, qürurunu və gələcəyə olan inamını simvolizə edir.

Zəfər Günü bizə yalnız keçmişin qəhrəmanlığını xatırlatmır, həm də gələcək qarşısında məsuliyyətimizi müəyyənləşdirir. Bu məsuliyyət Azərbaycanın müstəqilliyini qorumaq, dövlətimizi daha da gücləndirmək, milli birliyimizi möhkəmləndirmək və şəhidlərimizin əmanətinə sahib çıxmaqdır.

8 Noyabr hər bir azərbaycanlının qəlbində qürurla yaşanan, milli kimliyimizi və azadlıq iradəmizi ifadə edən müqəddəs tarixdir. Bu gün biz qalib xalq olmağın sevincini yaşayır, qəhrəmanlarımızın xatirəsi qarşısında baş əyir və gələcəyə böyük inamla baxırıq.

Yaşasın müstəqil Azərbaycan! Yaşasın Azərbaycan xalqının birliyi və həmrəyliyi! Zəfər Günümüz mübarək olsun!