Natiq Allahverdiyev
YAP Qax rayon təşkilatının sədri
Yeni Azərbaycan Partiyasının VIII Qurultayı Azərbaycanın ictimai-siyasi həyatında mühüm hadisələrdən biri kimi diqqət çəkdi. Qurultay Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin çıxışı ilə yadda qaldı. Çıxışda yalnız partiyanın fəaliyyəti və keçdiyi tarixi yol deyil, həm də Azərbaycanın ərazi bütövlüyü və suverenliyinin bərpasından sonra qarşıda duran əsas vəzifələr, ölkənin təhlükəsizlik siyasəti, iqtisadi inkişafı, beynəlxalq mövqeyi və Qarabağda aparılan bərpa-quruculuq işləri ətrafında geniş fikirlər səsləndirildi.
Yeni Azərbaycan Partiyası 1992-ci il noyabrın 21-də Heydər Əliyevin təşəbbüsü ilə yaradılıb. Ölkənin mürəkkəb siyasi və iqtisadi vəziyyət yaşadığı həmin dövrdə partiyanın formalaşması Azərbaycanın siyasi həyatında mühüm hadisə oldu. Sonrakı illərdə YAP ölkənin siyasi sistemində aparıcı təşkilatlardan birinə çevrildi. Qurultayda partiyanın keçdiyi yol Azərbaycanın dövlətçilik tarixinin ayrı-ayrı mərhələləri ilə əlaqəli şəkildə təqdim edildi. Xüsusilə 1990-cı illərin əvvəllərində mövcud olmuş siyasi və iqtisadi böhrandan sabitliyə, dövlət institutlarının möhkəmləndirilməsinə və iqtisadi inkişaf mərhələsinə keçid vurğulandı.
VIII Qurultayın əsas xüsusiyyətlərindən biri onun Azərbaycanın ərazi bütövlüyünün və suverenliyinin tam bərpa edilməsindən sonra keçirilməsidir. 2020-ci il Vətən müharibəsində əldə olunan nəticələr və 2023-cü ilin sentyabrında keçirilən hərbi tədbirlər Azərbaycanın ərazi bütövlüyünün və suverenliyinin təmin olunması ilə nəticələndi. Bununla ölkənin qarşısında yeni siyasi mərhələ formalaşdı. Artıq əsas məsələlərdən biri əldə edilmiş nəticələrin qorunması, təhlükəsizlik imkanlarının gücləndirilməsi və regionda davamlı sülh üçün şəraitin yaradılmasıdır.
Bu baxımdan Prezident İlham Əliyevin çıxışında hərbi gücün artırılması xüsusi yer tutdu. Sülh prosesində irəliləyişlərin olmasına baxmayaraq, Azərbaycanın müdafiə qabiliyyətinin daim yüksək səviyyədə saxlanmasının vacibliyi vurğulandı. Burada söhbət yalnız ordunun maddi-texniki imkanlarının genişləndirilməsindən deyil, müdafiə sənayesinin inkişafından, müasir texnologiyaların tətbiqindən və ölkənin ümumi təhlükəsizlik potensialının gücləndirilməsindən gedir. Müasir dövrdə təhlükəsizlik anlayışı informasiya və kibermühitdə baş verən prosesləri də əhatə etdiyindən, informasiya savadlılığı, təhsil və gənclərin düzgün istiqamətləndirilməsi də mühüm məsələlər sırasında yer alır.
Cənab Prezidentin çıxışında diqqətçəkən istiqamətlərindən biri Qarabağ və Şərqi Zəngəzurda həyata keçirilən genişmiqyaslı bərpa prosesidir. Azad edilmiş ərazilərdə yaşayış məntəqələri yenidən qurulur, yol, enerji, sosial və kommunal infrastruktur yaradılır, keçmiş məcburi köçkünlərin öz doğma torpaqlarına qayıdışı təmin edilir. Prezidentin çıxışında bildirildiyi kimi, həmin ərazilərdə artıq 96 min insan yaşayır, çalışır və təhsil alır, 48 yaşayış məntəqəsində məskunlaşma həyata keçirilib. Bu göstəricilər Böyük Qayıdış prosesinin mərhələli şəkildə genişləndiyini göstərir.
VIII Qurultayda YAP-ın Sədri cənab İlham Əliyevin çıxışında, həmçinin Azərbaycanın iqtisadi imkanları və enerji siyasəti də xüsusi diqqət mərkəzində olub. Ölkənin iqtisadi müstəqilliyinin möhkəmləndirilməsi, investisiyaların cəlb edilməsi, qeyri-neft sektorunun genişləndirilməsi və sənayenin şaxələndirilməsi əsas istiqamətlər kimi qeyd edilir. Azərbaycan neft və qazla yanaşı, elektrik enerjisi, neft-kimya məhsulları və gübrə istehsal edib ixrac edən ölkə kimi enerji sahəsində mövqelərini genişləndirir. Orta Dəhliz və Şimal-Cənub nəqliyyat marşrutlarının inkişafı isə Azərbaycanın tranzit və logistika imkanlarını artırır, ölkənin regional iqtisadi əlaqələrdə rolunu gücləndirir.
Prezident İlham Əliyevin çıxışında iqtisadi inkişafın sosial nəticələri də ön plana çəkilib. Minimum əməkhaqqının, pensiyaların və sosial müavinətlərin artırılması ilə bağlı açıqlamalar əhalinin sosial rifahının dövlət siyasətində mühüm istiqamət olaraq saxlanıldığını göstərir. Beləliklə, iqtisadi artımın sosial müdafiə tədbirləri ilə əlaqələndirilməsi və əhalinin rifahının yüksəldilməsi qarşıdakı mərhələnin əsas istiqamətlərindən biri kimi təqdim olunur.
Xarici siyasət məsələləri də çıxışın mühüm hissəsini təşkil edib. Azərbaycanın müxtəlif dövlətlər və beynəlxalq təşkilatlarla əməkdaşlığını genişləndirməsi, enerji və nəqliyyat layihələri vasitəsilə regional əlaqələrdə fəal iştirak etməsi ölkənin beynəlxalq mövqeyinə təsir göstərən əsas amillərdəndir. Azərbaycanın coğrafi mövqeyi, enerji resursları və nəqliyyat infrastrukturu Avropa ilə Asiya arasında bağlantıların inkişafında ölkəyə mühüm imkanlar yaradır. Bu çərçivədə enerji təhlükəsizliyi və nəqliyyat dəhlizləri həm iqtisadi, həm də geosiyasi əhəmiyyət daşıyır.
Beləliklə, Yeni Azərbaycan Partiyasının VIII Qurultayı Azərbaycanın keçdiyi mürəkkəb və mühüm tarixi yolun yekunlarının nəzərdən keçirilməsi ilə yanaşı, qarşıdakı mərhələnin əsas hədəflərinin müəyyənləşdirildiyi mühüm siyasi platforma kimi diqqət çəkir. Qurultayda səsləndirilən fikirlər göstərir ki, Azərbaycanın yeni inkişaf mərhələsində təhlükəsizlik, iqtisadi güc, sosial rifah, insan kapitalı, fəal xarici siyasət və milli maraqların qorunması vahid strategiyanın bir-birini tamamlayan istiqamətləridir.
Bu gün qarşıda duran əsas vəzifə əldə edilmiş tarixi nəticələri qorumaq, onları davamlı inkişafın möhkəm təməlinə çevirməkdir. Qarabağ və Şərqi Zəngəzurun bərpası, Böyük Qayıdışın sürətləndirilməsi, yeni iqtisadi və nəqliyyat imkanlarının yaradılması, enerji potensialının genişləndirilməsi, investisiyaların cəlb olunması və insan kapitalının inkişafı Azərbaycanın gələcək gündəliyinin mühüm istiqamətlərini təşkil edir.
VIII Qurultayda səsləndirilən mesajların mahiyyəti ondan ibarətdir ki, Zəfər yalnız tarixi nəticə kimi deyil, yeni inkişaf mərhələsinin başlanğıcı kimi dəyərləndirilir. Qarşıdakı dövrdə əsas məqsəd qazanılmış imkanları daha da genişləndirmək, ölkənin iqtisadi və təhlükəsizlik potensialını gücləndirmək, azad edilmiş ərazilərdə həyatın tam bərpasını təmin etmək və Azərbaycanın regional imkanlarını daha səmərəli şəkildə reallaşdırmaqdır.
Məhz bu baxımdan YAP-ın VIII Qurultayı Azərbaycanın dünəninə verilən siyasi qiymətlə yanaşı, sabahına yönəlmiş baxışın da ifadəsidir. Qurultayda müəyyənləşdirilən prioritetlər bir həqiqəti önə çıxarır: əldə edilmiş Zəfəri qorumaq qədər, onun yaratdığı yeni imkanları dayanıqlı inkişaf, güclü iqtisadiyyat, təhlükəsiz gələcək və daha yüksək rifah üçün səfərbər etmək də qarşıdakı mərhələnin başlıca vəzifəsidir.