Lilpar Cəmşidqızı

QƏZƏL

Könlüm quşu bülbül kimi əfğan edə bilmir,
Ruhum nədən öz canımı heyran edə bilmir?

Yarın qəmi çox aşiqi bimar eləyibdir,
Canan unudub məşuqu mehman edə bilmir.

Dərmanı gətir, Yar, yenə dərd əhlinə hərdən,
Rəhman eliyən çarəni loğman edə bilmir.

Peymani- məhəbbətdə könül sabit olubdur,
Ancaq dağılan xanəmi səhman edə bilmir.

Haqqın qulu olmaq bəşər övladına xasdır,
Dövran dəyişən bəndəni insan edə bilmir.

Dəryayə girən aşiqi ümman batırıbdır,
Bəhrin dibi hər canlını mərcan edə bilmir.

Sevdayə düşən könlünü susdurdun, a Lilpar,
Tərlan kimi qəlbin daha cövlan edə bilmir.

***

Alıbdı ağlımı başdan fərağı Dilbərimin,
Gələydi bir kərə haqdan, sorağı Dilbərimin.

Fəzayi- eşqdəyəm, ruhumun səması odur,
Günəş doğan kimi parlar yanağı Dilbərimin.

Əsəndə badi- səba tellərim cəlalə dönür,
Toxunsa zülfümə hərdən darağı Dilbərimin.

Cahan vəfasız olub, qəmküsar gəlir, qayıdır,
Yanır- sönür yenə qəmdən çırağı Dilbərimin.

Məhəmmədin yoludur, Məkkədən keçən gecəsi,
Gedibdi Qüdsə o şimşək burağı Dilbərimin.

Yazan- pozan odur aləmdə hər kəsin ömrün,
Qələmlə sirdaş olubdur varağı Dilbərimin.

Uzandı Yar əli, Lilpar, fənanı tərk edəsən,
Qırılmasın, qoru, möhkəmdi bağı Dilbərimin.