Rəhim Hacızadə
YAP Qax rayon təşkilatının əməkdaşı
Azərbaycan Respublikasının Konstitusiyasının 1995-ci il noyabrın 12-də ümumxalq səsverməsi yolu ilə qəbul edilməsi müstəqil dövlətçilik tariximizin ən mühüm hadisələrindən biridir. Bu tarixi sənəd ölkəmizdə demokratik, hüquqi və dünyəvi dövlət quruculuğunun əsasını qoyaraq müstəqil Azərbaycanın siyasi və hüquqi sistemini formalaşdırdı.
Dövlət müstəqilliyimizi bərpa etdikdən sonra ölkədə hökm sürən siyasi böhran, iqtisadi çətinliklər və təhlükəsizlik problemləri yeni Konstitusiyanın hazırlanmasını çətinləşdirirdi. 1993-cü ildə Ümummilli Lider Heydər Əliyevin xalqın tələbi ilə siyasi hakimiyyətə qayıdışından sonra ölkədə sabitliyin təmin olunması və dövlət institutlarının möhkəmləndirilməsi istiqamətində mühüm addımlar atıldı. Məhz Ulu Öndərin rəhbərliyi ilə hazırlanmış Konstitusiya layihəsi 1995-ci il noyabrın 12-də referendumla qəbul edildi və həmin ayın 27-də qüvvəyə mindi. Bu, Heydər Əliyevin Azərbaycan dövlətçiliyi qarşısında misilsiz xidmətlərindən biri oldu.
Konstitusiyamızın əsas xüsusiyyətlərindən biri insan və vətəndaş hüquq və azadlıqlarına verdiyi yüksək dəyərdir. Əsas Qanunumuz hər kəsin qanun qarşısında bərabərliyini, şəxsi toxunulmazlığını, fikir və söz azadlığını, mülkiyyət və digər fundamental hüquqlarını təmin edir. Eyni zamanda, dövlət hakimiyyətinin qanunvericilik, icra və məhkəmə qollarına bölünməsi, xalq hakimiyyəti və qanunun aliliyi prinsipləri demokratik dövlət quruculuğunun hüquqi əsaslarını müəyyənləşdirir.
Zamanın tələblərinə uyğun olaraq 2002, 2009 və 2016-cı illərdə keçirilən referendumlar nəticəsində Konstitusiyaya bir sıra əlavə və dəyişikliklər edildi. Bu dəyişikliklər dövlət idarəçiliyinin təkmilləşdirilməsinə, insan hüquqlarının müdafiəsinin gücləndirilməsinə və hüquqi sistemin müasir tələblərə uyğunlaşdırılmasına xidmət etdi.
Bu gün Konstitusiyamızın tarixi əhəmiyyəti Azərbaycanın ərazi bütövlüyünü və dövlət suverenliyini tam bərpa etməsi ilə daha da artır. 2020-ci ildə Vətən müharibəsində qazanılan tarixi Zəfər və 2023-cü ildə həyata keçirilən antiterror tədbirləri nəticəsində ölkəmizin bütün ərazisində suverenliyimiz təmin olundu. Bununla da Konstitusiyamızın hüquqi qüvvəsinin Azərbaycanın bütün ərazisində bərqərar olması üçün tarixi şərait yarandı.
Prezident İlham Əliyevin 2024-cü il dekabrın 28-də imzaladığı Sərəncamla 2025-ci ilin “Konstitusiya və Suverenlik İli” elan edilməsi Əsas Qanunumuzun və dövlət suverenliyimizin əhəmiyyətini bir daha ön plana çıxardı.
Bu gün Azərbaycan Konstitusiyası müstəqilliyimizin, suverenliyimizin, milli birliyimizin və hüquqi dövlət quruculuğumuzun möhkəm təminatıdır. Onun prinsiplərinə hörmətlə yanaşmaq, qanunun aliliyini qorumaq və dövlətçiliyimizin daha da güclənməsinə töhfə vermək hər bir vətəndaşın borcudur. Konstitusiyamız güclü dövlətimizin hüquqi təməli, gələcək inkişafımızın və müstəqilliyimizin təminatıdır.