Gürcüstanda texnologiya və biznes ixtisası üzrə təhsil alan tələbələr üçün beynəlxalq süni intellekt düşərgəsi açılıb.

Bu barədə Gürcüstanın İqtisadiyyat və Davamlı İnkişaf Nazirliyinin nəzdindəki İnnovasiya və Texnologiya Agentliyi məlumat yayıb.

Bildirilir ki, düşərgədə Gürcüstan, Azərbaycan, Qırğızıstan, Ukrayna, Ermənistan və Birləşmiş Ərəb Əmirliklərindən 60-dan çox tələbə iştirak edir. Düşərgə regionda keçirilən ən böyük beynəlxalq süni intellekt düşərgələrindən biridir. Düşərgənin proqramı ingilis dilində tədris olunur və kompüter mühəndisliyinə giriş, süni intellekt və texnikanın öyrənməsi, süni intellekt dövründə kibertəhlükəsizlik, süni intellektdə sahibkarlıq, müxtəlif sənaye və peşələrdə süni intellekt tətbiqi, problemlərin müəyyən edilməsi və digər mövzuları əhatə edir.

Proqram tələbələri beynəlxalq trendlər və süni intellektin praktik tətbiqləri ilə tanış etmək, onların texniki, analitik və sahibkarlıq bacarıqlarını inkişaf etdirmək və onları ixtisaslaşmış təlim və praktik seminarlara cəlb etmək məqsədi daşıyır.

İştirakçılar, həmçinin beynəlxalq komandalar yarada və real dünya problemlərinin həlli üzərində əməkdaşlıq edə biləcəklər.