Mənim canım oğlum. Adımı daşıyan Qubadım. Bu gün artıq yeni yaşını qeyd edirsən. Səninlə qürur duyuram. Sən ananın ümidi, qardaşının dayağısan. Sən nənənin, babanın təsəlli yerisən. Müharibə aman vermədi səninlə gözəl xatirələrimiz olsun. Ancaq mən səni seyr etdikcə sən hiss etməsən də hər zaman yanında oluram. Yeriyərkən ilk mənim şəklimə qaçmağını, danışarkən ilk ata deməyini, gülümsəməyini, hər xırda dəcəlliyini belə qürurla seyr edirəm, oğlum. Anan sənə hər baxanda məni görür. Bilirəm ki, adını hər çağıranda ürəyi titrəyi. Onu heç vaxt incitməyin. O balaca ürəyində sizə bəlli etməsə də dünya boyda dərd daşıyır. Gözümüzün ilki Elcanımız son beşiyimiz Qubadımız isə Xanımı ayaqda saxlayan tək qüvvədir. Odur ki, ananızı hər zaman qoruyun. Ağlamağa, üzülməyə qoymayın.
Mənim canım oğlum sənə arzuların ən gözəlini arzulayıram. Hər zaman sağlam hər zaman gözəl günlər nəsibiniz olsun. Uğurlarınla sevindirəsən bizi. Ad günün mübarək, mənim balaca, Qubadım!

***

Sənə layiq olacam
(Şəhid Qubad Əliyevin xatirəsinə)

Səndən sonra gəlmişəm sən olmayan dünyana,
Kaş bir möcüzə ola, mənim atam oyana.
Məzarına dönməyə qala bizlə əbədi,
Bu balaca qəlbimin olmasın bir də dərdi.

Mən də görəm atamı, o qəhrəman adamı,
Onlu xoş günlər ilə bəzəyəm bu dünyamı.
Deyirlər mənim atam sevərmiş bu həyatı,
Rəksmiş, musiqiymiş atamın da qanadı.

Həyət dolu birinə yaraşarmı heç məzar,
Niyə puç oldu belə mən gəlməmiş arzular.
Mənim atam sinəsin verdi güllə önünə,
Ən şərəfli ölümü seçdi özü-özünə.

Şəhid oldu vətənçün, axdı qanı torpağa,
O canıyla, qanıyla bağlı idi bayrağa.
Mən şəhid övladı tək bu dünyaya gəlmişəm,
O qəhrəman atamı heç görə
bilməmişəm.

İndi onun adını qürurla daşıyıram,
Mən də igid Qubat tək, qürurlu yaşıyıram.
Fəxr edirəm, atacan, səninlə hər bir zaman,
Sənə layiq olacam yaşadığım hər bir an.

Esmira Günəş
"Atributinfo.az"