Gəncədə “Gələcəyin Kənd Təsərrüfatı 2026: Elm, innovasiya və dayanıqlılıq” mövzusunda respublika elmi-praktik konfransı keçirilib.
"Atributinfo.az" xəbər verir ki, tədbirdə Milli Məclisin deputatı Müşfiq Cəfərov çıxış edərək aqrar sektorun ölkənin iqtisadi inkişafında, ərzaq təhlükəsizliyinin təmin olunmasında və regionların sosial rifahının yüksəldilməsində mühüm roluna diqqət çəkib.
Azərbaycan Dövlət Aqrar Universitetinin (ADAU) təşəbbüsü və təşkilatçılığı ilə “Regional Expo Gəncə 2026” sərgisi çərçivəsində keçirilən konfransda dövlət qurumlarının, elmi-tədqiqat müəssisələrinin, ali təhsil ocaqlarının, özəl sektorun nümayəndələri, alimlər, tədqiqatçılar və gənc mütəxəssislər iştirak ediblər.
Konfransda kənd təsərrüfatının gələcək inkişaf istiqamətləri, elmi nailiyyətlərin istehsalata tətbiqi, rəqəmsal texnologiyaların imkanları, innovativ idarəetmə modelləri və dayanıqlı aqrar istehsal məsələləri müzakirə olunub.
Tədbirdə çıxış edən Milli Məclisin deputatı Müşfiq Cəfərov aqrar sektorun Azərbaycanın iqtisadi potensialının gücləndirilməsi və ərzaq təhlükəsizliyinin etibarlı təmin olunması baxımından strateji əhəmiyyət daşıdığını vurğulayıb. Deputat kənd təsərrüfatında müasir texnologiyaların, innovativ yanaşmaların və elmi tədqiqatların tətbiqinin vacibliyini qeyd edib.
Müşfiq Cəfərovun çıxışının əsas istiqamətlərindən biri aqrar sahənin inkişafında dövlət siyasətinin prioritetlərinin ardıcıl həyata keçirilməsi və elmi potensialdan daha səmərəli istifadə olunması olub. Bu baxımdan, elmi müəssisələrlə fermer təsərrüfatları, universitetlərlə özəl sektor arasında əməkdaşlığın genişləndirilməsi mühüm əhəmiyyət kəsb edir.
Deputatın diqqət çəkdiyi məsələlər aqrar sektorun yalnız ənənəvi istehsal sahəsi kimi deyil, müasir texnologiyalara, elmi yeniliklərə və rəqabətqabiliyyətli iqtisadi modelə əsaslanan strateji inkişaf istiqaməti kimi formalaşmasının vacibliyini bir daha gündəmə gətirib.
Konfransın açılışında ADAU-nun rektoru Zəfər Qurbanov aqrar sektorun gələcək inkişafında elmi tədqiqatların, rəqəmsal texnologiyaların və dayanıqlı istehsal modellərinin rolundan danışıb. O, tədbirə 350-dən çox elmi məruzənin təqdim edildiyini, 237 tezisin qəbul olunduğunu bildirib.
Qeyd olunub ki, konfransın elmi materialları 42 ali təhsil və elmi-tədqiqat müəssisəsini təmsil edən 369 tədqiqatçının iştirakı ilə hazırlanıb. Bu göstəricilər ölkədə aqrar elmin inkişafına, elmi mühitin genişlənməsinə və gənc tədqiqatçıların fəallığına verilən önəmin ifadəsidir.
Konfransda, həmçinin Gəncə Şəhər İcra Hakimiyyətinin başçısı Niyazi Bayramov, Milli Məclisin deputatı Naqif Həmzəyev, eləcə də elm, təhsil və aqrar sektorun nümayəndələri çıxış ediblər.
Tədbir çərçivəsində aqrar iqtisadiyyat və aqrobiznes, bitkiçilik və torpaqşünaslıq, dayanıqlı kənd təsərrüfatı, aqromühəndislik, mexanikləşdirmə, rəqəmsal texnologiyalar və mütəxəssis hazırlığı istiqamətləri üzrə elmi müzakirələr aparılıb.
Ümumilikdə, Gəncədə keçirilən respublika elmi-praktik konfransı Azərbaycanın aqrar sektorunun gələcək inkişaf modelinin elmi, texnoloji və iqtisadi əsaslarının müzakirəsi baxımından mühüm platforma kimi diqqət çəkib. Tədbir bir daha göstərib ki, kənd təsərrüfatının dayanıqlı inkişafı yalnız istehsal həcminin artırılması ilə deyil, elmi biliklərin, innovasiyaların, müasir idarəetmə mexanizmlərinin və insan kapitalının vahid inkişaf strategiyasında birləşdirilməsi ilə mümkündür.
Bəradər Səməndərli
"Atributinfo.az"
