Rəşad Mahmudov Milli Məclisin Səhiyyə Komitəsinin sədr müavini,
millət vəkili
17İyun Azərbaycanda səhiyyə işçilərinin peşəbayramı kimi təsis olunmuş, cəmiyyətimizin ən ali missiyalarından birini daşıyan insanlara həsr edilmiş xüsusi bir gündür. Bu günün təməli Ulu Öndər Heydər Əliyev tərəfindən qoyulmuş, Azərbaycan səhiyyəsinin inkişaf yoluna verilən strateji dəyərin və dövlətçilik yanaşmasının bariz ifadəsi olmuşdur.
Azərbaycan səhiyyəsi son onilliklərdə böyük bir inkişaf yolu keçmişdir. Bu yol yalnız infrastrukturun yenilənməsi və ya yeni tibb müəssisələrinin açılması ilə ölçülmür. Əsas dəyişiklik insan amilində, peşəkarlıq səviyyəsində, səhiyyənin idarə olunmasında və ən önəmlisi isə vətəndaşa göstərilən xidmətin keyfiyyətində özünü göstərir.
Bu gün möhtərəm Prezident cənab İlham Əliyev'in rəhbərliyi ilə ölkəmizdə həyata keçirilən səhiyyə islahatları sistemli, ardıcıl və məqsədyönlü şəkildə davam etdirilir. İcbari tibbi sığortanın tətbiqi, regionlarda müasir xəstəxanaların qurulması, yüksək texnologiyalı tibbi xidmətlərin genişləndirilməsi və kadr hazırlığının gücləndirilməsi bu siyasətin əsas istiqamətlərindəndir. Bu islahatlar səhiyyə sistemini daha əlçatan, daha çevik və daha effektiv bir mərhələyə gətirib çıxarmışdır.
Biz səhiyyə işçiləri isə bu sistemin ən ön cəbhəsində dayanırıq. Hər gün insan həyatına toxunan, bəzən bir ailənin ümidini, bəzən bir uşağın gələcəyini, bəzən də bir xalqın sağlamlığını daşıyan bir məsuliyyətin içindəyik. Bu məsuliyyət ağırdır, çətindir, amma eyni zamanda müqəddəsdir.
Azərbaycan həkimi bu gün artıq yalnız müalicə edən deyil, həm də insan həyatını qoruyan, səhiyyə mədəniyyətini formalaşdıran, beynəlxalq standartlara uyğun tibbi xidmət göstərməyi hədəfləyən bir peşəkar modelə çevrilməkdədir. Bu yol asan deyil. Amma biz inanırıq ki, Azərbaycan həkimi bu yükü daşıya biləcək gücdədir.
Bir mütəfəkkirin dediyi kimi, “böyük sistemlər böyük insanlarla formalaşır.” Bizim səhiyyəmizin gücü də məhz onun insan kapitalındadır.
Bu gün bütün səhiyyə işçilərini səmimi qəlbdən təbrik edir, onlara bu şərəfli və çətin yolda möhkəm iradə, sağlamlıq və səbir arzulayıram. Arzum odur ki, Azərbaycan səhiyyəsi hər bir vətəndaş üçün ən yüksək keyfiyyətli, əlçatan və beynəlxalq standartlara uyğun tibbi xidmətin ünvanına çevrilsin.
Peşə bayramınız mübarək, əziz dostlar!