Ali təhsil hər kəs üçün zəruri deyil. Müasir yanaşmaya görə əsas məqsəd hər bir fərdin bacarıq və maraqlarına uyğun təhsil və karyera yolunun seçilməsidir. Əmək bazarının tələbatı göstərir ki, praktiki bacarıqlara malik ixtisaslı kadrlar da ən az ali təhsilli mütəxəssislər qədər vacibdir.

Bu fikirləri Peşə Təhsili üzrə Dövlət Agentliyinin İctimaiyyətlə əlaqələr sektorunun rəhbəri Aytən Səfərəliyeva deyib. O bildirib ki, dövlət səviyyəsində həyata keçirilən islahatlar məhz bu yanaşmanı dəstəkləyir: “Prezident İlham Əliyevin müvafiq Sərəncamına uyğun olaraq peşə təhsilinin inkişafı, yeni ixtisasların yaradılması və əmək bazarına uyğun kadr hazırlığının gücləndirilməsi prioritet kimi müəyyən edilib. Bu isə alternativ təhsil yollarının, xüsusilə peşə təhsilinin əhəmiyyətinin artdığını göstərir. Eyni zamanda, peşə təhsili alanlar üçün inkişaf imkanları məhdud deyil. Yüksək texniki peşə təhsili səviyyəsini bitirən məzunların ali təhsilə keçid imkanının olması bu iki istiqamətin bir-birini tamamladığını göstərir. Əsas məsələ ali təhsilin mütləq olması deyil, düzgün seçimdir. İnsanların öz potensialına uyğun istiqamət seçməsi həm fərdi uğur, həm də əmək bazarının balanslı inkişafı baxımından daha effektivdir”.