Yeni Azərbaycan Partiyası (YAP) Göygöl rayon təşkilatı üzrə 2№-li Regional Yol Yaşıllaşdırılması və Ekologiya MMC ərazi partiya təşkilatında “Konstitusiya və Suverenlik İli” çərçivəsində “Hər bir xalq üçün müstəqil və suveren dövlət yaratmaq onun ən böyük nailiyyətidir” mövzusunda tədbir keçirilib."Atributinfo.az" xəbər verir ki, tədbir zamanı ilk öncə Ümumilli Lider Heydər Əliyevin və torpaqlarımızın azadlığı uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.
YAP Göygöl rayon təşkilatının sədri Vüqar İsayev tədbiri giriş sözü ilə açaraq bildirib ki, Prezident İlham Əliyevin 2025-ci ilin “Konstitusiya və Suverenlik İli” kimi qeyd edilməsi ilə bağlı imzaladığı Sərəncam 30-cu ilini qeyd edəcəyimiz Konstitusiyamıza və ölkəmizin suverenliyinə verilən dəyərin təcəssümüdür və müasir Azərbaycan tarixində mühüm hadisə hesab edilən bu addım 12 noyabr 1995-ci ildə qəbul edilən Azərbaycan Respublikasının Konstitusiyasının müəllifi Ümummilli Lider Heydər Əliyevin xatirəsinə və milli dövlətçiliyimizin möhkəm təməl üzərində qurulmasına dərin ehtiramın ifadəsidir.
Vüqar İsayev “Konstitusiya və Suverenlik İli”nin dövlətin hüquqi əsaslarının möhkəmləndirilməsi, dövlət suverenliyinin daha da gücləndirilməsi məqsədi daşıdığını vurğulayaraq, istənilən xalq üçün müstəqil, suveren dövlətini yaratmaq və onu inkişaf etdirmək ən böyük nailiyyət olduğunu qeyd edib. Bildirib ki, 1990-cı illərin əvvəllərindən hərbi təcavüz ilə üzləşən ölkəmizin ərazilərinin iyirmi faizinin işğal edilməsi ilə qarşı-qarşıya qaldığı zaman daxildə cərəyan edən mürəkkəb proseslər, vətəndaş qarşıdurması, anarxiya, ölkənin müstəqilliyi üçün yaranan təhdidlər onu göstərdi ki, ölkəni yaranmış ağır vəziyyətdən yalnız Ulu öndər Heydər Əliyev kimi güclü, prinsipial və iradəli lider xilas edə bilər. Xalqın təkidli tələbi ilə yenidən hakimiyyətə qayıdan Ümummilli lider Heydər Əliyev xalqımızın tarixinə milli dövlətçiliyin xilaskarı kimi daxil oldu. 1991-ci il oktyabrın 18-də qəbul edilmiş “Azərbaycan Respublikasının dövlət müstəqilliyi haqqında” Konstitusiya Aktında yeni Konstitusiyanın hazırlanması nəzərdə tutulsa da, 1991–1993-cü illərdə mövcud olan xaos və ziddiyyətli proseslər bunu qeyri-mümkün etmişdir. Yalnız Ümummilli lider Heydər Əliyevin hakimiyyətə qayıdışından sonra Konstitusiyanın qəbulu mümkün oldu.
Tədbirdə 2№-li Regional Yol Yaşıllaşdırılması və Ekologiya MMC ərazi partiya təşkilatının sədri Nizami Çıraqov, partiya fəalı Şəhla İsmayılova və digərləri çıxış edərək Yeni Azərbaycan Partiyasının fəaliyyəti dövründə əldə etdiyi qələbələrdən, dünya çapında özünəməxsus yerə malik olmasından və gələcək inkişaf perspektivlərindən danışmışlar. Qeyd olunub ki, Azərbaycan özünü bölgənin ən güclü və qalib dövləti kimi təsdiqləyib. 2025-ci ilin ölkəmizdə “Konstitusiya və Suverenlik İli” elan olunması müasir Azərbaycan dövlətçiliyinin inkişafında mühüm əhəmiyyət kəsb edən bir hadisədir. İnanırıq ki, “Konstitusiya və Suverenlik İli” çərçivəsində həyata keçiriləcək tədbirlər cəmiyyətimizdə həmrəylik ovqatını daha da genişləndirəcək, 2025-ci il milli birlik və həmrəylik ilimizə çevriləcəkdir.
Tədbirin sonunda YAP Göygöl rayon təşkilatının ictimai-siyasi həyatında fərqlənən və eyni zamanda yubiley yaşı tamam olan ƏPT sədri Çıraqov Nizami Qafar oğluna fəxri fərman və qiymətli hədiyyə təqdim edilmişdir.
Bəradər Səməndərli
"Atributinfo.az"
