Aqil Məmmədov 123 saylı Kəlbəcər seçki dairəsindən seçilən Milli Məclisin sabiq deputatı,
Kəlbəcər Rayon Ağsaqqallar Şurasının sədri
2020-ci ilin iyulun 12-dən günorta saatlarından başlayaraq Ermənistan silahlı qüvvələri Ermənistan-Azərbaycan dövlət sərhədinin Tovuz rayonu istiqamətində atəşkəsi kobud şəkildə pozaraq Azərbaycan Ordusunun mövqelərini atəşə tutub. Düşmən daha sonra mövqelərimizi iriçaplı silahlardan və ağır artilleriyadan atəşə tutmaqda davam edib.
Tovuz döyüşləri Azərbaycanın hərb tarixinə şanlı səhifə kimi yazılıb. Döyüşlər zamanı bir sıra hərbi qulluqçularımız qəhrəmancasına şəhid olub. Onlar arasında general-mayor Polad Həşimov, polkovnik İlqar Mirzəyev, mayorlar Namiq Əhmədov və Anar Novruzov, baş leytenant Rəşad Mahmudov, gizirlər İlqar Zeynallı və Yaşar Babayev, eləcə də müddətdən artıq hərbi xidmət qulluqçuları — əsgər Elçin Mustafazadə, çavuş Vüqar Sadıqov, əsgər Nazim İsmayılov, baş əsgər Elşad Məmmədov və əsgər Xəyyam Daşdəmirov şəhidlik zirvəsinə ucalıblar.
Tovuz döyüşləri həm də xalqın birliyini və Azərbaycan Ordusunun gücünü bir daha nümayiş etdirib. Bu qəhrəmanlıq salnaməsi Vətən müharibəsinə aparan yolun önəmli mərhələlərindən biri kimi yadda qalıb.