Türkiyənin ixracında aktiv artım müşahidə olunur. 2025-ci ilin sentyabr ayının nəticələrinə əsasən, ölkə bütün il üçün nəzərdə tutulmuş 390 milyard ABŞ dolları həcmində mal və xidmət ixracı hədəfinə çatıb.

Bunu Ankarada keçirilən brifinqdə Türkiyənin ticarət naziri Ömər Bolat bəyan edib.

Ö.Bolat bildirib ki, əgər 2024-cü ilin yekununda Türkiyənin xidmətlərinin ixrac həcmi 117 milyard ABŞ dolları təşkil edirdisə, cari ildə bu göstərici 121 milyard dollara çatacaq. Eyni zamanda, malların ixrac həcmi rekord həddə – 269 milyard ABŞ dollarına yüksəlib.

Nazirin sözlərinə görə, 2025-ci ilin sentyabrında Türkiyənin ixrac həcmi 22,6 milyard ABŞ dolları olub ki, bu da ötən ilin eyni ayı ilə müqayisədə 3 faiz çoxdur. “Bütün bunlar Türkiyə iqtisadiyyatında müsbət tendensiyanın davam etdiyini göstərir”, – deyə nazir vurğulayıb.

Bolat, həmçinin Türkiyənin ticarət-iqtisadi əlaqələrinin inkişafı məqsədilə həyata keçirilən çoxsaylı beynəlxalq təmaslardan danışıb. “Təkcə son 9 ay ərzində Türkiyə dünyanın 44 ölkəsi ilə ticarət danışıqları aparıb”, – deyə o qeyd edib.

Ö.Bolat gələn həftə Azərbaycanda keçiriləcək Türk Dövlətləri Təşkilatının 12-ci sammitinin əhəmiyyətini vurğulayıb. “Prezident Rəcəb Tayyib Ərdoğanı müşayiət edəcək böyük nümayəndə heyəti ilə Azərbaycana səfər etməyi planlaşdırırıq”, – deyə nazir bildirib.