Məqsədimiz addım-addım irəliləyərək Konfrans Liqasının əsas mərhələsinə yüksəlməkdir.

Bu sözləri "Zirə"nin futbolçusu Eren Aydın UEFA Konfrans Liqasının I təsnifat mərhələsində Bakıda Gürcüstanın "Torpedo" komandasını 3:0 hesabı ilə məğlub etdikləri oyundan sonra deyib.

Türkiyəli futbolçu qələbəni layiqli mübarizənin nəticəsi kimi dəyərləndirib: "Yaxşı oyun keçirdik. Rəqib Gürcüstan Kubokunun son qalibi idi. Onları izləmək imkanımız olmuşdu. Liqaları davam etdiyi üçün bizdən daha hazırlıqlı idilər. Fiziki cəhətdən üstün görünürdülər. Biz isə tətildən yeni qayıtmışdıq və hazırlıq üçün çox vaxtımız olmamışdı. Buna baxmayaraq, yaxşı mübarizə apardıq və qalib gəlməyi bacardıq. Ümid edirəm ki, cavab görüşündə də eyni oyunu göstərərək qələbə qazanacağıq".

O, komandanın avrokuboklardakı hədəflərindən danışıb: "Biz addım-addım irəliləmək istəyirik. Hazırda əsas məqsədimiz bu raundu adlamaqdır. Sonra növbəti mərhələni düşünəcəyik. Açığı, Konfrans Liqasının əsas mərhələsinə yüksəlmək istəyirik. Bunun çətin olacağını bilirik. Amma əlimizdən gələnin ən yaxşısını edəcəyik".

Eren Aydın Türkiyə millisinin dünya çempionatındakı çıxışına da münasibət bildirib: "Düşünürəm ki, kifayət qədər yaxşı mübarizə apara bilmədik. Halbuki futbolçu keyfiyyəti baxımından bir çox komandadan üstün idik. Amma futbolda təkcə keyfiyyət kifayət etmir. Meydanda mübarizə aparmadan qalib gəlmək mümkün deyil. Ümid edirəm ki, növbəti böyük turnirlərdə Türkiyə millisini daha uğurlu görəcəyik".

O, Türkiyə millisinin baş məşqçisi Vinçenso Montellanın ünvanına səslənən tənqidlərə də toxunub: "Mən məşqçi olmadığım üçün bu barədə fikir bildirməyim düzgün olmaz. Eyni peşənin nümayəndələriyik və məşqçiləri tənqid edən tərəfdə deyiləm. Məncə, nəticələri yalnız baş məşqçi ilə əlaqələndirmək düzgün deyil".

Qeyd edək ki, “Zirə” və “Torpedo” arasında cavab oyunu iyulun 16-da Gürcüstanda olacaq.