Rəşad Mahmudov

Milli Məclisin Səhiyyə komitəsinin sədr müavini, tıbb elmləri doktoru

Bu gün sizinlə həkimliyin ən ağır sınaqlarından biri olan, son dərəcə ağır vəziyyətdə olan xəstə qarşısında həkimin qərarı, məsuliyyəti və risk almaq cəsarəti haqqında danışmaq istəyirəm. Bu, günümüz tibbinin ən ağrılı yeridir.

Ürək çatışmazlığı bu gün dünyada ən ağır və proqnozu ciddi olan xəstəliklərdən biridir. Xüsusilə irəliləmiş mərhələlərdə onun ölüm riski ən ağır xərçəng növləri ilə müqayisə edilə biləcək, hətta bəzi hallarda daha yüksək səviyyəyə çata bilir.
Buna baxmayaraq, ölkəmizdə belə ağır xəstələrə yüksək riskli və mürəkkəb müdaxilələrin həyata keçirilə bilməsi, bunu bacaran təcrübəli komandaların formalaşması həqiqətən qürurvericidir.
Amma məsələnin başqa bir tərəfini də unutmamalıyıq. Bəzən qarşımızda müdaxilə edilmədiyi təqdirdə yaşamaq şansı son dərəcə aşağı olan bir xəstə dayanır. Müdaxilə isə ona 70–80 faiz uğur şansı verə bilər, lakin eyni zamanda 20–30 faiz ciddi ağırlaşma və ya ölüm riskini də özündə daşıya bilər. Belə əməliyyatlarda hər xəstə və hər nəticə eyni olmur; dünyanın ən güclü mərkəzlərində belə bütün xəstələri xilas etmək mümkün deyil.
Məhz buna görə stəkanın yalnız boş tərəfinə deyil, dolu tərəfinə də baxmağı bacarmalıyıq. Əgər həkim hər dəfə “birdən nəticə pis olar” qorxusu ilə yüksək riskli xəstəyə müdaxilə etməkdən çəkinərsə, həmin bir uğursuzluqdan qaçmaq naminə xilas edilə biləcək onlarla, bəzən yüzlərlə insanın yaşamaq şansını da əlindən almış olarıq.
Əlbəttə, yüksək risk heç vaxt məsuliyyətsiz qərara haqq qazandırmır. Əksinə, risk artdıqca doğru diaqnoz, doğru göstəriş, doğru zamanlama, kifayət qədər təcrübə və doğru komanda daha böyük əhəmiyyət daşıyır.
Arzumuz budur ki, bütün bu imkanlardan istifadə edərək heç bir insanı ümidsiz buraxmayaq. Eyni zamanda cəmiyyət olaraq da tibbin imkanlarına, yüksək riskli müdaxilələrə və onların nəticələrinə daha adekvat, məntiqli və ədalətli yanaşmağı bacaraq.

Hər kəsə xəstəliklərdən uzaq, sağlam və mənalı ömür arzulayıram.