“BMT-yə üzv olan əksər ölkələr, bütün beynnəlxalq təşkilatlar Azərbaycanın ərazi bütövlüyünü tanıyır və bütün bunlar müvafiq sənədlərdə öz əksini tapıb. Ermənistanın 30 ilə yaxın Azərbaycan ərazilərinin 20 faizini işğal altında saxlaması, milli, mədəni, dini abidələri məhv etməsi dost ölkələr tərəfindən kəskin şəkildə qınanmasını, BMT Təhlükəsizlik Şurası Ermənistanın Azərbaycan torpaqlarını işğalı ilə bağlı 4 qətnaməsini də bura əlavə edə bilərik. ATƏT-in və digər Avropa institutlarının sənədlərində Ermənistanın işğalçılıq siyasətinə haqq qazandırılmasa da, rəsmi İrəvanın işğala son qoyması üçün ciddi addımlar atılmasa da, ATƏT-in Minsk qrupunun dişsiz, səmərəsiz cəhdləri olsa da heç bir dövlət, heç bir beynəlxalq qurum Qarabağın Azərbaycan torpağı olduğunu inkar edə bilmədi. 44 günlük Vətən Müharibəsini də Azərbaycan öz ərazilərində apardı, separatizmə, terrorizmə qarşı mübarizə məqsədilə aparılan savaşda qalib gəldi, düşməni öz ərazilərindən qovub çıxardı”. Bunu açıqlamasında Milli Məclisin deputatı Aydın Hüseynov deyib.
Deputat bildirib ki, müharibə Ermənistanın kapitulyasiyası ilə bitdi: “Sonunda Azərbaycan və Rusiya prezidentləri və Ermənistanın baş naziri arasında üçtərəfli bəyanat imzalandı. Bəyanatın 4-cü bəndində yazılır ki, “Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilir. Rusiya Federasiyasının sülhməramlı kontingentinin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyəti ilə bağlı Tərəflərdən hər hansı biri çıxış etməzsə, müddət avtomatik olaraq növbəti 5 ilə uzadılır”. Qeyd olunduğu kimi, erməni silahlı birləşmələri Qarabağ ərazisini tərk etməlidirlər. Amma nə görürük, erməni yaraqlıları Rusiya sülhməramlıları ilə yanaşı fəaliyyət göstərirlər. Bu barədə Azərbaycan tərəfi Qarabağda müvəqqəti yerləşdirilən Rusiya sülhməramlılarına dəfələrlə iradlarını bildirsə də nəticə gözləntilərin tam əksinə olub. Mart ayının 26-da Rusiya Müdafiə Nazirliyi tərəfindən verilən və həqiqəti əks etdirməyən, birtərəfli açıqlaması isə yalnız təəssüf hissi doğurur. Halbuki Azərbaycan silahlı Qüvvələri Qarabağın bəzi məntəqələrində mövqelərin və dislokasiya yerlərinin dəqiqləşdirilməsi aparıb. Bütün bunlar Rusiya sülhməramlılarının gözü qarşısında baş verib. Amma nədənsə Rusiya Müdafiə Nazirliyi Ermənistan tərəfinin verdiyi yalan informasiyalara söykənərək açıqlama verir. Bütün bunlar Rusiya ilə Azərbaycan arasında imzalanmış müttəfiqlik sazişinin bəndlərinə uyğun gəlmir.
Azərbaycan 2020-ci il 10 noyabr tarixli üçtərəfli bəyanata sadiqdir, Ermənistan isə xislətinə uyğun olaraq bölgədə qeyri-sağlam mühit, xalqlar arasında qarşıdurma yaratmağa meyllidir. Ermənistan bəyanatın 4-cü bəndinə zidd olaraq ordusunun qalıqlarını və qeyri-qanuni erməni silahlı dəstələrini Azərbaycan ərazilərindən tam olaraq çıxarmayıb. Bəyanatın müddəalarını Azərbaycan deyil, məhz Ermənistan pozub”.

"Atributinfo.az"