Ölkəmizdə səfərdə olan Türkiyə Böyük Millət Məclisinin Sədri cənab Mustafa Şəntopun başçılıq etdiyi nümayəndə heyəti oktyabrın 19-da Fəxri Xiyabanda Ümummilli lider Heydər Əliyevin məzarını ziyarət edib.
Nümayəndə heyətinin üzvləri Azərbaycanın müstəqilliyinin memarı Heydər Əliyevin xatirəsini yad edərək məzarı önünə əklil qoyublar.
Sonra qonaqlar görkəmli oftalmoloq, alim Zərifə xanım Əliyevanın məzarını ziyarət edərək məzarının önünə gül dəstələri düzüb.
TBMM-nin Sədri Mustafa Şəntopun başçılığı ilə Türkiyə nümayəndə heyəti Şəhidlər Xiyabanına gəlib. Türkiyəli deputatlar burada Azərbaycanın müstəqilliyi uğrunda canlarından keçmiş Azərbaycan övladlarının məzarlarını ziyarət edib, “Əbədi məşəl” kompleksinin önünə nümayəndə heyətinin adından əklil qoyublar.
Türkiyə nümayəndə heyəti “Türk Şəhidliyi”nə gələrək, burada qəhrəman türk əsgərlərinin xatirəsini anıb, “Türk şəhidliyi” abidəsinin önünə əklil qoyub.