Rəşad Mahmudov
Milli Məclisin Səhiyyə Komitəsinin sədr müavini, millət vəkili

Bayram günləri yalnız sevinc və bir araya gəlmək deyil, həm də xatırlamaq və mənəvi bağları yeniləmək zamanıdır. Bu günlərdə biz təkcə yaşayanlarla deyil, artıq aramızda olmayan, amma qəlbimizdə yaşayan əziz insanlarla da bir növ görüşürük. Onların məzarlarını ziyarət etmək illərdir yaşatdığımız dərin bir ənənədir.

Bu gün ailəmizlə birlikdə vəfat etmiş doğmalarımızın məzarlarını ziyarət etdik. Dualar oxuduq, xatirələrimizi yad etdik. Bu səssiz anlarda insan həyatın yalnız bu gün yaşadıqlarından ibarət olmadığını daha dərindən anlayır. Keçmişimiz, xatirələrimiz və bizi biz edən dəyərlər bu anlarda daha aydın hiss olunur.
Dəyişən və sürətlə avtomatlaşan dünyada belə ənənələr bizi insan olaraq saxlayan ən qiymətli mənəvi dayaqlardandır. Keçmişə hörmət göstərmək gələcəyə doğru atılan ən sağlam addımlardan biridir. Çünki insan öz köklərini unutduqda istiqamətini də itirir.
Bu ziyarətlər yalnız bir ehtiram deyil, həm də gələcək nəsillərə verilən bir mesajdır. İnsan olmaq yaddaşını qorumaq, bağlılığını itirməmək və dəyərlərinə sahib çıxmaq deməkdir.

Allah cəmi köçənlərə rəhmət eyləsin. Ruhları şad olsun!