İlqar Həkim (Əlyəsə oğlu)
DUYĞULARIM ELƏ HƏMƏN QALIBDI!
Yolum düşdü köhnə yurdun yanından,
Ruh ayrıldı sevdaların canından.
Keçən ömrün axşamından , danından
Ala toran bir xatirən qalıbdı !
Ocaq yeri qaraldıbdı daşını
Haça qaya uçurubdu laçını
Sarı söyüd salxımlayıb saçını,
Göy çəməndən koma kətyən qalıbdı!
Dəyişmişdi çıxdığımız yoxuşlar,
Göz yaşında gizlənmişdi yağışlar
Dumanlıqdan boylansa da baxışlar
Baxışdan sis, görüşdən çən qalıbdı !
Nə hasar var, nə cəftə var, nə kilid
Çırpı xal-xal, çökmüş yataq, tək söyüd,
Kölgəsində köçdən qalan qanıq it
Qumlu çadır, sökük çətən qalıbdı !
Eşələyib axtarmadım dərində
Mürgülədi köhnə yurdun sirrində,
Yadaşımın silinməyən yerində
O duyğular elə həmən qalıbdı !