Seylan Abbas

Şaxta baba

Şaxta baba, gəlsənə,
Qar qızını gətirsənə.
Çiynində torba olsun,
İçi sovqatla dolsun.

Geyin qarlı yapıncı,
Əlində buz qılıncı.
Harayla uşaqları,
Tez sevindir onları.

Söylə, gəlib qarlı qış,
Eyləyək çoxlu alqış.
Böyük bir yolka quraq,
Ona bər-bəzək vuraq.

Hər yanı zərli olsun,
Üstü bəxşişlə dolsun.
Gəlsin qonaq olanlar,
Yaxşı rəqs edir onlar.

Ağacdələnlə kirpi,
Dələ, tısbağa, tülkü
Tutsun hər kəs əl-ələ,
Gəlib nəğməylə dilə.

Bizimlə söyləsinlər:
“Xoş gəlmisən, Yeni il!
Xoşbəxt olaq ilbəil.”

Qış gecəsi

Ağappaq, naxış-naxış
Yağan qara baxsana,
Qoşulub qar selinə
Çiçək-çiçək axsana.

Qar yağan qış gecəsi
Bənzəyir tül duvağa,
Hər yana sığal çəkər
Astaca yağa-yağa.

Qışın şaxta rəssamı
Buz ilə rəsm çəkər,
Şüşələrin üstünə
Donmuş naxışlar çökər.

Buzlu, soyuq gecədən
Şaxtanın səsi gələr,
Ay da bulud dalından
Soyuq nurunu ələr.