İlqar həkim

Mənim şerimin tamı birtəhər,
Bir az turşməzə, bir az acıdı .
Mənim şerlərim içimdə zəhər,
Üzümdə yalançı dərd əlacıdı .

Mənim şerimin küskündür halı,
Əhvalı qarışıq ,yarası duzdur.
Mənim şerimdə ölüm bahalı
Mənim şerimdə həyat ucuzdur ..

Mənim şerimdə dünya firavan
Balıqlar su gəzir, quş dən axtarır.
Mənim şerimdə bir qərib oğlan
İllərdi yurdunda Vətən axtarır .

Mənim şerlərim bir istək sonu,
Harayı, sükutu, zəngi bilinmir.
Çətindi üzümdən oxumaq onu
Acı göz yaşında rəngi bilinmir .

Mənim şerimi kitabda gəzmə,
Bükülüb atılmış vərəqdə axtar.
Nəğməli ürəkdə ,dodaqda gəzmə
Həsrət yaş axıdan yanaqda axtar .

Mənim şerlərim elə şer ki,
Cümləsi natamam, sözü yarımdı.
Mənim şerlərim şer deyil ki,
Kağıza tökülən xəyallarımdı.