GÖZLƏRİ ÇİÇƏK, BAKI QIZLARI
Vahid Əziz – 80

Professor Vidadi Orucov Xalq şairi Vahid Əziz haqqında yazır:

Gözləri çiçəkdi, qəlbləri buta,
Tutsa ağlamağı, dönər buluda.
Çətini odur ki, ürəyi tuta –
Qəlbdən sevəcəkdi Bakı qızları.
Bakı qızları bu misralarda artıq bir insan obrazı deyil, şəhərin özüdür - mavi Xəzərin dalğası, İçərişəhərin daş nəfəsi, küləyin səmaya qaldırdığı ahəngdir. Onların gözəlliyi yalnız baxışlarda deyil, qəlbin dərin qatlarında gizlənən mərdlikdə, səmimiyyətdə və sözlə ifadə olunmayan duyğularda yaşayır. Bakılı qızları sevəndə, qış qəlbinə yaz çökər, daşlarda belə güllər açar. Şairin dili ilə desək, onlar göylə yer arasında körpü olan, həm mənanın, həm də estetik görünüşün eyni anda vücuda toplandığı ilahi varlıqlardır — şəhərin nəfəsi, mədəniyyətin ritmi, Vətənin qürurudur
Vahid Əziz bu misralarda qadın gözəlliyini yalnız zahiri təsvirlərlə deyil, həm də dərin mənəvi simvolla təqdim edir. “Gözləri çiçək, qəlbləri buta” bənzətməsi həm estetik təravəti, həm də ruhani zənginliyi eyni anda ifadə edir. Buta qadının səmimiyyətini, möhkəmliyini və kainatla harmoniyasını simvollaşdırır; çiçək isə incəliyi, narınlığı və həyatın təravətini əks etdirir.
“Çətini odur ki, ürəyi tuta…” misrası göstərir ki, Bakılı qızların duyğuları səthi deyil; bu qəlblər yalnız sözlərlə deyil, ürəklə danışanlara açılır. Burada sevgi, etibar və bağlılıq səthi münasibətlərə yer buraxmır. Şair vurğulayır ki, onların qəlbini qazanmaq həm diqqət, həm hörmət tələb edir. Bakılı qızının baxışı dəniz qədər dərin, onun ruhu isə külək qədər sərindir.
Bu çiçək sevdalı şair - Vahid Əziz yazır ki, gözəllik yalnız gözlə görünən deyil, həm də qəlblə duyulan, ruhla hiss olunan bir fenomendir. Bakı qızları isə onun şeirində bu fenomeni ən incə, ən zərif, amma ən qüdrətli şəkildə təcəssüm etdirir:
Onların gözündə çiçəyin saflığı,
qəlbində butanın alovu yatır.
Gülüşləri Xəzərin sahilinə vurulan ilk dalğa qədər safdır,
ağılları başdan alandır - bir dəfə vurulan, bir ömür təkrar vurular.
Bakılı qız sevəndə, sevgi buluduna çevrilir,
bütün şəhərin üstünə məhəbbət yağdırır.
Şəhərin daşına can verən, ocağına nur verən gizli işıqdır onlar -
nurdur Bakılı qızlar.
Açıq-əngin səmaya bənzərlər:
baxdıqca gözəlləşər, tanıdıqca dərinləşərlər.
Dünyanın yükünü çiyinlə yox,
qeyrəti və namusuyla daşıyan böyük ürəkdir -
Vətəndir Bakılı qızları.



Vidadi Orucov
Pedaqogika elmləri doktoru, professor