
Şəmsulla Aqayi,
Cənubi Azərbaycan
GÖRƏN VAR MƏNİM TƏK, YANAN BİR BELƏ
Talehi kas olmuş düşgün şairəm
Axan var mənim tək, selə bir belə
Fələyin cövründən, bala dərdindən
Görən var mənim tək,yanan bir belə?
Nə göydə insaf var, nədə ki yerdə
Həmdəmim olubdur,qəm də, kədər də
Dağlar dözənmədi, mən dözən dərdə
Görən var mənim tək, yanan bir belə?
Yalvardım da, fələk sözün yeritdi
Gizlin dərdlər, şam tək məni əritdi
Qəm - qüssələr vallah məni çürütdü
Görən var mənim tək, yanan bir belə?
Əzəldən bəd yazıb alnıma yazan
Açmamış gülümü, soldurdu xəzan
"Şəmsulla" dözgünən, cəzandı cəzan
Görən var mənim tək, yanan bir belə?
Axan var mənim tək, selə bir belə?