İltizam Yusifov
Azərbaycan Respublikası Milli Mıclisinin deputatı

Novruz gəlişilə sanki küllü aləmə gözəllik gətirir, sevinc-təbəssüm, məhəbbət-səadət, sədaqət, barışıq gətirir, sönük ürəklərə odlu-alovlu xoş ovqat bəxş edir. Novruzun gəlisilə qoca təbiət qış yuxusundan oyanır, suların donu açılır, torpaq canlanır, günəş isti nəfəsilə canlı həyatı salamlayır, bir sözlə ilimiz təzələnir. Bu bayramda hər kəsin ürək sözləri, könül duyğuları doğmalara, yaxınlara ünvanlanır. Daim seçicilərinin yanında olan, onların qayğı və problemlərini diqqət mərkəzində saxlayan deputat İltizam Yusifov da bu arada "Atributinfo.az"-ın trinunasından xalqımıza Novruz təbriki ünvanlayıb. Təbriki olduğu kimi diqqətinizə çatdırırıq:
-Əziz həmvətənlər!
Bu gün bayram günüdür-Bahar bayramı, Novruz bayramıdır.
Novruz dünyanın ən qədim, ən müdrik, bayramlarından biridir. Yeni günün (Erkən gün - erkenekon), yeni həyatın başlanğıci mənasını verən Novruzda su, od, torpaq və yel kimi Çərşənbələrin qeyd edilməsi, bu bayramın insanların yaşamı, varlığı üçün ən vacib həyati komponentləri birləşdirərək hansı əhəmiyyətə, məntiqə söykəndiyi bir daha aydın olur. Həyatı baxımdan vacib ənənələri çox düzgün təcəssüm etdirən Novruz insanları həm də vahid mənəviyyat ətrafında birləşdirir. Dostları aramaq, hal-əhval tutmaq, qohumları ziyarət etmək, böyüklərə, valideynlərə baş çəkmək, sevdiklərimizə dəyər vermək, xatırlatmaq, imkansızları sevindirmək, dərdlilərdən hal-əhval tutmaq kimi xoş davranışlar Novruzun ən əsas özəlliklərindəndir.
Bu bayram həm də birlik deməkdir, qardaşlıq, doğmalıq deməkdir, bir-birimizi sevmək deməkdir. Novruz o cümlədən halallıq, təmizlik bayramıdır.
Hər birinizi Novruz bayramı münasibətilə təbrik edirəm. Sizlərə sağlam ömür, yeni, xoş günlər, xoş əhval-ruhiyyə arzulayıram. Yeni ilə, yeni günə yeni duyğularla, yeni arzularla qədəm qoyun.
Novruz bayramınız mübarək!