İbrahim Cəfərov,akademik
Hər bir xalqın taleyi onun dili ilə yazılır. Ana dili sadəcə ünsiyyət vasitəsi deyil, xalqın yaddaşı, tarixi, mədəniyyəti və milli kimliyidir. Bir millətin dili yaşayırsa, onun ruhu yaşayır. Dil zəifləyirsə, milli kimliyin dayaqları da sarsılır.
1 Avqust – Azərbaycan əlifbası və Azərbaycan dili günü hər bir azərbaycanlı üçün sadəcə təqvimdə bir tarix deyil. Bu gün ana dilimizə olan sevginin, ehtiramın və sədaqətin ifadəsidir.
Ulu Öndər Heydər Əliyev Azərbaycan dilini dövlətçiliyimizin əsas sütunlarından biri hesab edirdi. Onun "Biz dilimizlə fəxr etməliyik. Dil hər bir millətin milliliyinin əsasıdır" fikri bu gün də öz aktuallığını qoruyur. O, ən çətin dövrlərdə belə Azərbaycan dilinin dövlət dili statusu qazanması uğrunda qətiyyətli mübarizə apardı. 1978-ci ildə Azərbaycan SSR Konstitusiyasına "Azərbaycan Sovet Sosialist Respublikasının dövlət dili Azərbaycan dilidir" müddəasının daxil edilməsi məhz Heydər Əliyevin siyasi iradəsinin nəticəsi idi. Bu, o dövrün siyasi reallıqları fonunda böyük cəsarət nümunəsi idi.
Müstəqillik illərində də bu siyasət uğurla davam etdirildi. 1995-ci il Konstitusiyasında dövlət dilinin Azərbaycan dili olması təsbit edildi, 2001-ci ildə "Dövlət dilinin tətbiqi işinin təkmilləşdirilməsi haqqında" Fərman imzalandı, Azərbaycan Prezidenti yanında Dövlət Dil Komissiyası yaradıldı və elə həmin il Ulu Öndərin Fərmanı ilə hər il 1 avqustun Azərbaycan əlifbası və Azərbaycan dili günü kimi qeyd olunması qərara alındı.
Bu siyasi xətt bu gün Prezident İlham Əliyev tərəfindən uğurla davam etdirilir. Azərbaycan dilinin qloballaşma şəraitində qorunması, elektron məkanda istifadəsinin genişləndirilməsi, latın qrafikalı nəşrlərin artırılması, dövlət dilinin saflığının mühafizəsi istiqamətində qəbul edilən fərman və sərəncamlar ana dilimizin inkişafına yeni imkanlar açıb. Prezident İlham Əliyevin vurğuladığı kimi, "Azərbaycan dili o qədər zəngindir ki, heç bir xarici kəlməyə ehtiyac yoxdur."
Doğrudan da, dilimizi qorumaq yalnız dövlətin deyil, hər birimizin vətəndaşlıq borcudur.
Xüsusilə media nümayəndələrinin, müəllimlərin, yazıçıların, alimlərin və gənclərin bu məsuliyyəti daha böyükdür. Çünki hər yanlış ifadə, hər lazımsız yad söz ana dilimizin saflığına təsir göstərir.
Azərbaycan dili əsrlərin sınağından keçmiş, Nizaminin hikmətini, Füzulinin eşqini, Vaqifin müdrikliyini, Cəlil Məmmədquluzadənin satirasını, Bəxtiyar Vahabzadənin vətən sevgisini, Xəlil Rzanın azadlıq ruhunu yaşadan müqəddəs bir xəzinədir. Bu dil xalqımızı müstəqil dövləti olmadığı dövrlərdə belə qoruyub, milli varlığımızı gələcək nəsillərə çatdırıb.
Bu gün dünyada milyonlarla insan Azərbaycan dilində danışır. Onların hər biri ana dilimizin daşıyıcısı, milli kimliyimizin elçisidir.
Dilimiz yaşadıqca Azərbaycan da yaşayacaq, onun tarixi, mədəniyyəti və dövlətçiliyi əbədi olacaq.
Bu əlamətdar gündə hər birimiz özümüzə bir sual verməliyik: Ana dilimizi qorumaq üçün mən nə edirəm? Çünki dil yalnız qanunlarla deyil, onu sevən insanların qəlbində yaşayır.
Ana dilimiz bizim qürurumuzdur. O, keçmişimizdən gələcəyə uzanan mənəvi körpüdür. Gəlin bu körpünü birlikdə qoruyaq, zənginləşdirək və gələcək nəsillərə olduğu kimi, bəlkə də daha zəngin şəkildə ötürək.