https://atributinfo.az/ Yazarlar - Atributinfo.az - Azerbaycan'dan Son Dakika Haberler ve Güncel Bilgiler true https://atributinfo.az/cemiyyet/50455-dunyadan-musa-lkbrli-adnda-bir-air-d-kocdu.html atribut Cəmiyyət / Yazarlar Wed, 12 Aug 2026 20:08:12 +0400 Təbrizli bəstəkar və şair Səttar bəy mərhum şair Musa Ələkbərli ilə yaradıcılıq münasibətlərində olub. Musa Ələkbəlinin bir şeirini mahnıya çevirən Səttar bəy bəstəni ona göndərmək və fikrini öyrənmək istəyib.
Lakin Musa Ələkbərlidən cavab almadıqda şair dostlarından birinə mesaj yazaraq bildirib:
“Musa Ələkbəlinin bir şeirini mahnıya çevirdim. Bəyənsəniz, lütfən, Musa müəllimə göndərin. Məndən hamıya salamlar...”
Dostunun “Salam, qardaş. Təəssüf ki... Musa ötən il dünyasını dəyişib...” cavabı Səttar bəyi sarsıdıb.
“Offffff... Nə yersiz istək oldu... Çox kədərləndim... ‘Mən sənə yalvarmaram’ şeiri ilə yaşamışam... Allah rəhmət eləsin...” – deyə Səttar bəy yazıb.
Səttar bəyin Musa Ələkbəlinin sözlərinə bəstələdiyi mahnını sizinlə paylaşırıq.
Allah Musa Ələkbərliyə rəhmət eləsin, Səttar bəyə isə cansağlığı və yaradıcılıq uğurları arzulayırıq.



Çingiz Abbasov
Tovuz Xeyriyyə Cəmiyyətinin sədr müavini]]> true https://atributinfo.az/yazarlar/50438-bradr-smndrli.html atribut Yazarlar / Gündəm Tue, 11 Aug 2026 22:14:13 +0400
Bəradər Səməndərli

İLAHİ, BU GÖZƏL GÖZƏ GƏLMƏYƏ

Tanrı xoş çağında yaradıb səni,
Bu nə gözəllikdi, bu nə bənizdi?
Şairə təb verən elə pərisən,
Bunu vəsf etməyə söz də acizdi.

Baxdıqca doymayır göz, gözəlliyə,
Doğulur bakirə söz, gözəlliyə.
İlahi, bu gözəl gözə gəlməyə,
Baxışı dəryadı, gözü dənizdi.

Bu gözəl könlümə nur ələyibdi,
Ruhumu kökundən silkələyibdi.
Yoxsa, Günəş doğub, Ay bələyibdi,
Qeybdən gəlməsi heç şübhəsidi.

Sən, narın gülüsən, Gülün Narısan,
Məhəbbət bağının şirin barısan.
Vuran ürəyimin şah damarısan,
Sanma Səməndərli iradəsizdi.

QARĞALAR FESTİVAL YARADARDILAR

Dünyaya nur saçan Günəşlə, Aydı,
Dörd fəsil payızdı, qış, bahar, yaydı.
Bütün oxuyanlar bülbül olsaydı,
Quzğunlar şeş qoşa zər atardılar,
Qarğalar festival yaradardılar.

Bəs, nədən qəfəsdi yeri bülbülün?
Nədən "yek-du" düşür zəri bülbülün.
Gör kimlər Şusada xarı bülbülün,
Bağrının başını qopardardılar,
Qarğalar festival yaradardılar.

Alındı yurdumuz, quruldu büsat,
Daha xarı bulbul olubdu azad.
Budurmu həyəcan, budurmu təzad?
Dığalar oynayar, qol açardılar,
Qarğalar festival yaradardar.

Bəradər, bizimdi bu yurd, bu torpaq,
Torpağa olmusdu yağılar ortaq.
Paşinyan özünü sayırdı qoçaq;
Tonqal qalardılar, od çatardılar,
Qarğalar festival yaradardılar.

DEYİRİK

Dünya, sənə deyiləsi sözüm var,
Elə bilmə, sərvətində gözüm var.
Nə istiyə, nə soyuğa dözüm var,
Yayda qışı, qışda yayı deyirik.

Yoxdu özündən böyüyə hörmət də,
Ağdı valideyn üzünə züryət də.
Zalım eyş-işrətdə, fəqir zülmətdə,
Yasamağın çıxıb zayı, deyirik.

Demə, çərxi tərsə dönüb zamanın,
Su yeridən var altından samanın
Qarşısında baş əyirik qananın,
Qanmayan insana ayı deyirik.

Qarabağdan səsi gəlsin "köhlən"in,
O köhlənlər atlarıdı köhnənin.
BMT, ATƏT-də bizim ölkənin,
Taptalanır haqqı-sayı, deyirik.

Bəradər, çox qalıb hələ finala,
Yürüş vaxtıdı cənubdan şimala.
Biz Murova, Dəlidağa, Hinala,
Kəlbəcərin Himalayı deyirik.

TUTUBDU

Acısız şirin yox, şirinsiz acı,
Təzadlı yoğrulub ömrün umacı.
Dərənin düzü var, dağın yamacı,
Ay zülmət gecəyə fanar tutubdu,
Dünya əkslikdə qərar tutubdu.

Zülmətlə işıqdı gündüzlə gecə,
Göz ağı qaradan gərəkdir seçə.
Nə dalan qalıbdı, nə də ki, küçə,
Hərə bir tərəfdə divar tutubdu,
Dünya əkslikdə qərar tutubdu.

Qulluqçu yaşayır ağ gün, qul qara,
Günü, güzaranı olub zil qara.
Bəzi məmurların gözün pul-para,
Fəhlənin əllərin qabar tutubdu,
Dünya əkslikdə qərar tutubdu.

Tərəzi gözudü insanın üzü,
Qarışıq salmayın əyriylə düzü.
Hər gün əvəzləyir gecə gündüzü,
Xeyir-şər məclisi qatar tutubdu,
Dünya əkslikdə qərar tutubdu

Bəradər, hissləri içində boğma,
Tər tökən ölməyir biçində, qorxma.
Mənfiylə müsbətdi ögöylə doğma.
Doğma var, ögeydən tumar tutubdu,
Dünya əkslikdə qərar tutubdu.

ÖMÜR VƏFASIZDI, ZAMAN AMAN AMANSIZ

Zamanı geriyə çəkmək olsaydı,
İndiki ağlımla dönərdim geri;
İxtiyar çağımdan imtina edib,
Gənclik illərimə verərdim yeri.

Sağıma, soluma salardım nəzər,
Haqdan-ədalətdən yazardım əsər.
Hünər meydanında çalardım zəfər,
Olardım ömrümün igid əsgəri.

Günəşin yerini ay edən Allah,
Buludu ağladıb çay edən Allah,
Mənfini müsbətə tay edən Allah,
Əkiz yaradıbdı xeyirlə şəri.

Əlimlə itirdim gör neçə şansı,
Sevinclə kədərldi yaşam balansı.
Ömür vəfasızdı, zaman amansız,
Soyuq arxivdədi gənclik illəri.

Bürcüm tərəzidi, ilim ağ atdı
Əyrilik, axsaqlıq ruhuma yaddı.
Şairlik özü də bir istedaddı,
Yaşadır, tanıdır söz Bəradəri.

ƏLİNDƏDİ

Bu azad həyatdı, bu can əzizim,
Yaşamaq insanın öz əlindədi.
Nədən narazısan, nədən razısan;
Bilmirəm məqsədin gözəlim, nədi?

Nə soyuq ötüşdü, nə isti bu yaz,
Oldu yerbəyerdən fəslə etiraz.
İndi yetərincə mövzu var, di yaz,
Qələm barmağında, söz dilindədi.

Ağac darandıqca qalır tər yeri,
Yas üçün qurulur xeyir-şər yeri.
Yoxsa ki, qurudur əlin hər yeri,
Gör neçə bəd nəzər, göz əlindədi.

Sözün qılıncdısa, özünsə qınsan,
Axtarma özgədə günahı, sınsan.
Bəşərin alisi yaranıb insan,
Əyri nəfsindədi, düz əlindədir.

Bəradər, ünvanın tapar söz indi,
Çatınca ünvana bacar döz indi.
İçindən yandırır odu köz indi,
Ocaq içindədi, köz əlindədi.]]> true https://atributinfo.az/cemiyyet/50419-doum-gununuz-mubark-ziz-air.html atribut Cəmiyyət / Yazarlar Mon, 10 Aug 2026 20:45:46 +0400 Bu gün gözəl poeziya nümunələri ilə oxucularının qəlbinə yol tapan, sözə özünəməxsus nəfəs verən istedadlı şair Rəfail Həbiboğlunun doğum günüdür.
Rəfail Həbiboğlu bizim üçün yalnız yaradıcılığı ilə sevdiyimiz şair deyil. O, Tovuz Xeyriyyə Cəmiyyətinin keçirdiyi tədbirlərdə yaxından iştirak edən, səmimi münasibəti, xoş sözü və gözəl şeirləri ilə məclislərimizə xüsusi rəng qatan dəyərli ziyalılarımızdandır. Onun poeziyası ilə feyziyab olur, söz dünyasından mənəvi zövq alırıq.
Şairin özünün də yazdığı kimi, o, şeiri başqalarından bir başqa cür yazır. Bəzən bir misra şairin düşüncəsinə hakim kəsilir, onu saatlarla öz ardınca aparır. Sonra həmin misra sözə, sözlər şeirə çevrilir. Bu misralarda şairin yaradıcılıq dünyasının səmimiyyətini, sözə sevgisini görmək mümkündür.
“Bircə misra gəlib girir beynimə,
Saatlarla o havada gəzirəm...”
Bu misralar əslində Rəfail Həbiboğlunun poeziyaya münasibətinin kiçik bir poetik etirafıdır. O, sözü sadəcə yazmır, onu yaşayır, duyur, qoruyur və nəhayət, oxucusuna ərməğan edir.
Əziz Rəfail müəllim!
Sizi doğum gününüz münasibətilə Tovuz Xeyriyyə Cəmiyyəti adından ürəkdən təbrik edir, Sizə möhkəm cansağlığı, uzun ömür, ailə səadəti, yaradıcılıq uğurları və yeni-yeni poetik zirvələr arzulayırıq.
Qələminiz daim iti, sözünüz daim işıqlı, ilhamınız tükənməz olsun. Hər yeni misranız könüllərə sevinc, hər yeni şeiriniz oxucularınıza mənəvi feyz gətirsin.
Doğum gününüz mübarək, əziz şair!

Hörmət və ehtiramla,
Çingiz Abbasov
Tovuz Xeyriyyə Cəmiyyətinin sədr müavini]]> true https://atributinfo.az/cemiyyet/50418-yaa-yarat-sgr-qarda-o-vaxt-silahnla-vtni-tmsil-edirdin-indi-qlminl-aqil-abbas.html atribut Cəmiyyət / Yazarlar Mon, 10 Aug 2026 19:45:37 +0400 Aqil Abbas
Yazıçı, jurnalist, Milli Məclisin üzvü

1997-ci il Novruz bayramı ərəfəsi idi. Azərbaycan televiziyasından zəng elədilər ki, hərbi hissəyə görüşə gedirik, həm yazıçı, şairlərlə, həm də geniş konsert proqramıyla, gedərsiz? Mən də dedim ki, məmnuniyyətlə. Günortaya yaxın gəldilər. Mən dedim ki, öz maşınımla gedirəm. Dedim, əsgərlərə nə sovqat aparırsız, dedilər ki, konsert proqramı.
Mənim atam həmişə deyirdi, oğul, əsgər yanına, xəstə yanına və bir də dustaq yanına heç vaxt əliboş getmə.
Atamın bu vəsiyyətini söylədim, sonra da dedim maşını mənim ardımca sürün. O vaxt «Lider» kanalının yanında topdansatış mağazaları vardı, getdik ora. Düşdüm diş fırçası, pasta, üzqırxan, ülgüc, corab, siqaret doldurdum maşının baqajına. Sonra da bir televizor, bir videomaqnitafon götürdüm, dedim indi gedək. Rəhmətlik Cabir Novruz maşından düşüb alnımdan öpdü, mən də dedim Cabir müəllim, gəl elə birlikdə gedək.
Getdik «N» hərbi hissəsinə. Bu hərbi hissəni yaxşı tanıyırdım. Yolum burdan tez-tez düşürdü. Bəzən dayanıb gözləyirdim ki, nə vaxt əsgərlər meydana çıxıb şəstlə addımlayıb əsgər marşları oxuyacaqlar. Elə addımlayırdılar ki, hasarın bu üzündə də yer silkələnirdi. Bu da mənə ləzzət edirdi, sevinirdim.
Bizi çox mehriban qarşıladılar.
Hərbi hissənin komandiri dedi ki, televizoru nahaq gətirmisiniz, bizim hər kazarmada, yeməkxanada, eləcə də əsgərlərin istirahət otaqlarında televizorlar quraşdırılıb.

Dedim qoy biri də bizdən olsun.
Hərbi hissəni gəzəndən sonra keçdik zala. Cabir Novruz çox gözəl şeirlər oxudu. Mən də çıxıb xeyir-duamı verdim, onların qələbə çalacağına inandığımı söylədim. Sonra sözü bir cavan, yaraşıqlı, amma arıq bir əsgərə verdilər. O da tribunaya qalxıb həqiqətən özünün çox gözəl şeirlərini oxudu. İstedadına söz ola bilməzdi. Mən də yenidən tribunaya qalxıb dedim:
- Əsgər qardaş, çox gözəl şeirlər oxudun. Təpədən-dırnağa şairsən, amma ölkədə şair bolluğudu, at bu şeir yazmağı, avtomatından bərk yapış, onu sevdiyin qız kimi əzizlə, bağrına bas. Bizə əsgər lazımdı, qarşıda bizi böyük döyüşlər gözləyir. Amma çox istedadlı oğlansan, qulluğunu başa vurandan sonra gəl «Ədalət» qəzetinə, söz verirəm səni işə götürəcəm.
Sonra da düşüb onu bağrıma basdım. Elşad Paşasoyla beləcə tanış olduq. Üstündən bir müddət keçəndən sonra gəldi redaksiyaya ki, hərbi qulluğu başa vurdum, gəlmişəm. Mən də bağrıma basdım, dedim bu gündən oldun bu qəzetin əməkdaşı.
Təxminən bir neçə ay bir yerdə çalışdıq. Çox azad fikirli jurnalist idi, çərçivələrə sığmaq istəmirdi. Bəzən həddindən artıq azad fikirliliyi mənim başıma bəla olurdu. Özünə deməsəm də, hiss elədi. Bir gün dedi ki, Aqil müəllim, görürəm sizə əziyyət verirəm, ona görə məni bağışla, mən başqa bir qəzetə keçmək istəyirəm.
- Nə təhər məsləhətindi. Amma bir-birimizə öyrəşmişdik, birtəhər yola gedirdik.
Gülümsədi. Görüşüb ayrıldıq. Bir yerdə işləməkdən ayrıldıq, amma həyatda ayrılmadıq.
Yardımlıdan olan bu gənc daha azad fikirli bir qəzetə – «Yeni Müsavat»a getdi. Bu qəzetdə həm qələmi açıldı, həm də qələmi cilalandı. Qəzetin üzdə olan əməkdaşlarından birinə çevrildi. Bəzən elə yazılar yazırdı ki, bir batman balla yemək olmurdu. Çox az bir müddətdə respublikada tanındı, bütün istedadı açıldı. Hazırda parlament müxbiridi. Tez-tez görüşürük. Mənə «müdir» deyə müraciət edir. Evində də olmuşam, çox gözəl ailəsi var. Özü kimi ağıllı iki oğul, bir qız böyüdür. Maşallah, qızı Aydan universitetdə təhsil alır. Böyük Oğlu Murad 10-cu sinifdə oxuyur, kiçiyi Cahangir Paşa isə bu il 1-ci sinifə gedəcək. Muradı lap çox istəyirəm, inə vaxt görüşsək ilk oğlunu soruşuram ki, necədi, necə oxuyur, idmana gedirmi?
Yardımlının balaca bir kəndində, dağ kəndində doğulan Elşad Paşasoy bu gün həm Yardımlını, həm də Azərbaycanı qələmiylə ləyaqətlə təmsil edir.
Mayın 10-da 51 yaşı tamam olur. Təbrik edirəm, həm öz adımdan, həm də haçansa çalışdığı «Ədalət» qəzetinin kollektivi adından.
Yaşa, yarat, əsgər qardaş. O vaxt silahınla Vətəni təmsil edirdin, indi qələminlə.
Yayda kəndinizə qonaq gəlmək istəyərdim. Bir-iki dəfə o kənddən yolum düşüb, insanları kimi çox gözəl kənddi. Sən də öz qələminlə bu gözəlliyə gözəllik qatırsan.

]]> true https://atributinfo.az/iqtisadiyyat/50414-yeddi-ayda-azrbaycanda-dovlt-qurumlarna-28-yeni-domen-verilib.html atribut İqtisadiyyat / Yazarlar Mon, 10 Aug 2026 11:53:44 +0400 Bu ilin yanvar-iyul aylarında Azərbaycanda dövlət qurumlarının istifadəsinə 28 yeni domen verilib.

Xüsusi Rabitə və İnformasiya Təhlükəsizliyi Dövlət Xidmətinə nəzdində Kompüter İnsidentlərinə Qarşı Mübarizə Mərkəzinə (Dövlət CERT) istinadla xəbər veririk ki, bu göstərici ötən ilin eyni dövrü ilə müqayisədə 9,7 faiz azdır.

Hesabat dövründə dövlət qurumlarının istifadəsinə 249 yeni subdomen də verilib. Bu isə illik müqayisədə 59 faiz artım deməkdir.

Təkcə iyul ayında dövlət qurumlarının istifadəsinə 5 domen və 38 subdomen verilib. Bu göstəricilər ötən ilin iyul ayı ilə müqayisədə müvafiq olaraq 67 faiz və 41 faiz çoxdur.

Qeyd edək ki, 2025-ci il ərzində dövlət qurumlarının istifadəsinə 65 yeni domen və 285 yeni subdomen verilib.]]> true https://atributinfo.az/cemiyyet/50408-ruhun-ad-olsun-ziz-dost-lvida-cingiz.html atribut Cəmiyyət / Yazarlar Mon, 10 Aug 2026 09:45:19 +0400 Sabir Rüstəmxanlı,
Xalq şairi

Vətəndən kənardayam. Bu gecə səhərə yaxın yuxuda gördüm Azərbaycan Milli Dram Teatrında Məmməd Arazın xatirə gecəsinə toplaşmışıq. Təlaşla məni axtarırlar:”Gəl,gəl, indi sən danışacaqsan”. Səhnə arxasına keçəndə gənclik dostum Çingiz Əlioğlunun səsini eşidirəm. Sap-sağlam, uca boyuyla dayanıb mikrafonun qabağında və çoxdan eşitmək arzusunda olduğum gur cavanlıq səsiylə danışır. Gör nə xoşbəxtlikdir,- deyirəm,-Çingiz sağalıb və hətta bu gecədə çıxış edir. Yana çevriləndə məni görür, gülümsəyir, nə dediyini eşitmirəm, amma birdən -birə çox da hündür olmayan, sinədən gələn səslə çoxdan eşitmədiyim həzin bir mahnımızı oxumağa başlayır.. Salondan alqış yüksəlir. Çingiz Qarabağlıdır, səsi gözəl idi və biz üç dost hərdən baş-başa verib qədim xalq mahnılarımızı oxuyirduq. Ancaq Cingizin tək oxuduğu yadıma gəlmir. Bu mahnını dinləyə-dinləyə ayılıram. Yuxu danışmaq xasıyyətim yoxdur, amma nədənsə səhər yeməyi vaxtı səhərə yaxın gördüyüm yuxunu masadakı yoldaşlarıma danışıram, ”ürəyim narahatdır, yəqin nə isə olub.”- deyirəm. Gündüz saat 3-də Seyran Səxavət zəng vürür: Çingizi hardan götürəcəklər? Və mən altmış illik əziz dostmun, görkəmli şairimizin vəfatından xəbər tuturam- vətəndən çox uzaqda. Sən demə o da səhərə yaxın bir nəğmə kimi uçub gedib
Çingiz Əlioğlu ilk şeirini 1967- ci ildə çap etdirmişdi. Ciddi yaradıcılıq yolu böyük şairimiz Rəsul Rzanın xeyir- duası ilə başlanmışdı. Şeirləri öz üslubu, ifadə tərzi ilə seçilirdi və buna görə də ötən əsrin axırı və bu əsrin əvvəlində şerimizin xorunda onun orijinal, təravətli, gur poetik səsi aydın eşidilirdi. Gənclər kitablarını sevə-sevə oxuyurdular. Bütün ömrünü kitab nəşri işinə sərf etdi, Gənclik nəşriyyatənda, Azərnəşrdə, Mətbuat və İnformasiya nazirliyində, xəstələnməzdən əvvəl Mədəniyyət nazitliyində çalışdı.Azərbaycanın Əməkdar Mədəniyyət xadimi idi. Ömrümüzün böyük bir hissəsini demək olaraq hər gün bir- birimizdən xəbər tutaraq yaşamışdıq. Çox sevdiyi Qarabağın azad torpaqlarında gəzə bilmədi, amma mən hər səfərimdən sonra sevincimi onunla bölüşürdüm. Xatirələrimiz bir kitaba sığmaz. Bənzərsiz, gözəl bir insan idi. Ruhun şad olsun, əziz dost. Əlvida, Çingiz!

]]> true https://atributinfo.az/yazarlar/50394-milli-kitabxanada-yazc-lisa-nicatn-90-illik-yubileyin-hsr-edilmi-kitab-srgisi-tqdim-olunub.html atribut Yazarlar Sun, 09 Aug 2026 12:54:36 +0400 Avqustun 8-də Milli Kitabxanada yazıçı, tərcüməçi və tarixçi Əlisa Nicatın anadan olmasının 90 illik yubileyinə həsr edilmiş kitab sərgisi təqdim olunub.

Milli Kitabxanadan bildirilib ki, sərgidə şairin şeirləri, nəsrləri, romanları, poemaları, povestləri, esseləri, hekayələri, tərcümələri, ön söz müəllifi, redaktoru olduğu, həyat və yaradıcılıq yolu haqqında Azərbaycan və xarici dillərdə kitablar, dövri mətbuat materialları nümayiş olunur.

Əlisa Nicat Azərbaycan ədəbiyyatında fəlsəfi hekayə və pritça janrının inkişafına mühüm töhfələr vermiş, tarixi roman və fəlsəfi antologiya-ensiklopediyaların müəllifi kimi geniş tanınıb. O, “Gəncəli müdrik”, “Nağıllara dönən tarix”, “Ehram”, “Sarsılmaz Mir Cəfər”, “Mələklər və iblislər”, “Rza xan”, “Qızılbaşlar”, “Fenomen”, “Əsrin mənzərəsi”, “Sirli xəzinə”, “Müdriklik məbədi”, “Bülbül və gül”, “101 Dahi”, “Qızıl fəlsəfə”, “Tiranlar və kölələr”, “Vətənpərvər” və digər əsərlərin müəllifidir.]]> true https://atributinfo.az/cemiyyet/50369-mustafa-cmnli-natvan-azrbaycan-dbi-muhitinin-inkiafna-muhum-tohflr-verib.html atribut Cəmiyyət / Yazarlar Sat, 08 Aug 2026 11:52:47 +0400 Xurşidbanu Natəvanın ədəbi irsi və şəxsiyyəti bu gün də aktuallığını qoruyur. O, XIX əsrin ən nüfuzlu şəxsiyyətlərindən biri olmaqla yanaşı, Azərbaycan ədəbi-mədəni mühitinin inkişafında mühüm rol oynayıb. Natəvan "Məclisi-Üns" ədəbi məclisinin yaradıcısı və himayədarı kimi dövrünün tanınmış şairlərini bir araya gətirib. Qarabağ xanlığının varisi olması ona bu istiqamətdə həm maddi, həm də mənəvi dəstək göstərmək imkanı verirdi. Məhz onun təşəbbüsü və himayəsi sayəsində "Məclisi-Üns" XIX əsr Azərbaycan ədəbi mühitinin ən nüfuzlu məclislərindən birinə çevrilmişdi.

Bu fikirləri yazıçı-publisist Mustafa Çəmənli səsləndirib.

O bildirib ki, Natəvan yaradıcılığında əsasən qəzəl janrına üstünlük verib. Onu digər şairlərdən fərqləndirən əsas cəhətlərdən biri ərəb və fars mənşəli sözlərdən imkan daxilində az istifadə etməsi idi. Şairə Azərbaycan türkcəsinin zəngin ifadə imkanlarından məharətlə yararlanaraq qəzəllərini oxucuya daha doğma və anlaşıqlı şəkildə təqdim edə bilib. Onun poeziyasında qadın zərifliyi, incə duyğular və zəngin daxili aləm aydın hiss olunur.

Mustafa Çəmənlinin sözlərinə görə, Natəvan təbiətə, xüsusilə gül və çiçəklərə böyük məhəbbət bəsləyirdi. Bu motivlər onun yaradıcılığında geniş yer tutur. Şairə hiss və düşüncələrini təbiət obrazları vasitəsilə ifadə etməyi bacarırdı. Eyni zamanda, o, rəssamlıqla da məşğul olurdu və bu bədii təfəkkür onun poetik dünyasında da öz əksini tapırdı. Elə buna görə də gül və çiçək obrazları Natəvan poeziyasının aparıcı bədii elementlərindən hesab olunur. Onun müasiri olan bir çox şairlər Natəvana nəzirələr yazmış, ona şeirlər həsr etmişlər.

Müsahib qeyd edib ki, Xurşidbanu Natəvan Azərbaycan tarixində həm də böyük xeyriyyəçi kimi xüsusi ehtiramla xatırlanır. O xatırladıb ki, həmçinin Natəvan şəxsi vəsaiti hesabına Şuşa şəhərinə su xətti çəkdirib. Həmin dövr üçün böyük əhəmiyyət daşıyan bu layihə təkcə şəhərin su təchizatını yaxşılaşdırmaqla kifayətlənməyib. Natəvan suyun uzun müddət sərin və təmiz saxlanılması üçün su anbarları tikdirib, həmçinin şəhər əhalisinin istifadəsi məqsədilə buzxana inşa etdirib. Şuşa sakinləri yay aylarında bu buzxanadan heç bir ödəniş etmədən, ehtiyacları qədər buz götürə bilirdilər.

Mustafa Çəmənlinin fikrincə, bu təşəbbüslər Xurşidbanu Natəvanın xalqına bağlılığını, xeyirxahlığını və ictimai məsuliyyət hissini parlaq şəkildə nümayiş etdirən tarixi nümunələrdəndir.]]> true https://atributinfo.az/cemiyyet/50305-mhrrm-qasmlnn-uurlar-hr-bir-tovuzlunu-sevindirir-v-qururlandrr.html atribut Cəmiyyət / Yazarlar Wed, 05 Aug 2026 14:01:03 +0400 Folklorşunas alimin doğum gününə təbrik üçün bir neçə söz

Azərbaycan folklorşünaslıq elminin görkəmli nümayəndəsi, filologiya elmləri doktoru, professor, Azərbaycan Aşıqlar Birliyinin sədri, Tovuz Xeyriyyə Cəmiyyətinin dəyərli üzvü Məhərrəm Paşa oğlu Qasımlını doğum günü münasibətilə səmimi-qəlbdən təbrik edir, ona möhkəm cansağlığı, uzun və bərəkətli ömür, yeni elmi nailiyyətlər və yaradıcılıq uğurları arzulayıram.
Məhərrəm müəllimin Azərbaycan folklorunun, aşıq sənətinin və milli-mənəvi dəyərlərimizin qorunması, araşdırılması və beynəlxalq aləmdə tanıdılması istiqamətində göstərdiyi misilsiz xidmətlər yüksək ehtirama layiqdir. Onun zəngin elmi irsi, pedaqoji fəaliyyəti və ictimai xidmətləri Azərbaycan elminin və mədəniyyətinin inkişafına mühüm töhfələr vermişdir.
Doğma Tovuzun yetirdiyi dəyərli ziyalı kimi Məhərrəm müəllimin uğurları hər bir tovuzlunu sevindirir və qürurlandırır. Tovuz Xeyriyyə Cəmiyyətinin tərkibində olaraq cəmiyyətimizə göstərdiyi diqqət və mənəvi dəstək də xüsusi dəyər daşıyır.
Arzu edirəm ki, Uca Tanrı Məhərrəm müəllimə sağlam, xoşbəxt və mənalı ömür nəsib etsin, onu yeni uğurlarla sevindirsin və xalqımıza xidmət yolunda daim qüvvətli etsin.

Çingiz Abbasov
Tovuz Xeyriyyə Cəmiyyətinin sədr müavini]]> true https://atributinfo.az/cemiyyet/50221-xalq-airi-nriman-hsnzad-fxri-xiyabanda-dfn-edilck.html atribut Cəmiyyət / Yazarlar Sat, 01 Aug 2026 11:49:53 +0400 Xalq şairi Nəriman Həsənzadə Fəxri xiyabanda dəfn ediləcək.

Bu barədə Mədəniyyət Nazirliyindən məlumat verilib.

Mərhum şairlə vida mərasimi Beynəlxalq Muğam Mərkəzində keçiriləcək.

Qeyd edək ki, Xalq şairi Nəriman Həsənzadə bu gün səhər saatlarında vəfat edib.]]>