Hicran Fuad Əhmədli

Fəsillərin şair qızı

Həzin-həzin bu ruhumu varaqlayar,

Saçlarıma əlin çəkər, sığallayar.

Hərdən mənlə qabaq-qənşər o ağlayar,

Fəsillərin şair qızı - gəl, payızım.

İçimdəki tufanları yarar bir-bir,

Ruhum onla sanki  olub qoşa, əlbir...

Dağınığam, yetiş dada, gətir səbir,

Fəsillərin şair qızı - gəl, payızım.

Vərəqlərim yol gözləyir, gör nə vaxtdır,

Şeir mənim ruhumdakı saray, taxtdır.

Dol, ruhuma sətirləri tez-tez axdır,

Fəsillərin şair qızı - gəl, payızım.

Hər nə desəm, qələm təkcə səni dinlər...

Bəzən misram ağı deyər, ruhu inlər.

Ovuc-ovuc xatirələr sənlə ələr,

Fəsillərin şair qızı - gəl, payızım.

Şəkil Muxtar Kərimzadə və təşəkkürlər.