Oruc Dadaşi Elman
Cənubi Azərbaycan şairi

NƏYİ YETMƏZ

Ulduz gözünə, aylı cəmalın nəyi yetməz
Eşqin günəşi nurlu kəmalın nəyi yetməz

Məndən alahı duyğuya varsan, qəmə dallam
Ey can, de görüm beylə xəyalın nəyi yetməz

Məcnun dəli, Fərhad yaralı, sən daş ürəksən
Yumşalmağa bir beylə misalın nəyi yetməz

Bəxtimdə ürək təxtinə canan səni görrəm
Sultanlıq üçün cahu cəlalın nəyi yetməz

Bir damla sevincin meyi, bir şanlı görüşdən
Dinc olmağa, könlümdə məlalın nəyi yetməz

Heç kimsə ömür mülkünə sahib çıxa bilməz
Səndən yaşanan bunca məcalın nəyi yetməz

Gözlər məni ovsunlayıban xəttinə salmış
Öldürməyə ol əyri hilalın nəyi yetməz

Bir an yumulub, tez açılan gözdə, gözüm var
Gizlin verilən hökmü həlalın nəyi yetməz

Bir daşlı bulaqdan süzülən doğmalıq hissin
Güllər qoxulu sevgi zülalın nəyi yetməz

Bilsin hamı, canlarda olan canlı diləkdən
Elman diləyən doğru Vüsalın nəyi yetməz