İlqar Əlyəsəoğlu (Həkim)
Novruz bayramınız mübarək !

Sevinc yağsın hər arzudan, diləkdən
Şirin dildən , saf könüldən, ürəkdən,
Üç kəlmə söz qanad alsın küləkdən
Nəğmə olsun, şeir olsun a dostlar !
Hər gününüz xeyir olsun a dostlar !

Bayram olsun çərşənbə də, cümə də
Bəzədilsin o daxma da, kümə də,
Fürsət düşsün telli saza yenə də
Dərd gözünü oyur olsun a dostlar!
Hər niyyətlər xeyir olsun a dostlar !

Hava, torpaq, oddu, sudu çərşənbə
Qış dərdini sərdi , yudu çərşənbə,
Aş dəmlənir- Dədə , budur çərşənbə!
Bəy xonçası seyir olsun a dostlar!
Niyyətiniz xeyir olsun a dostlar !

Novruz gəlir bahar yazı çağırır
Qonaqları anam özü çağırır,
Uşaqlar da papaq atır, çığırır
Kosa- keçəl yeyir- olsun a dostlar
Hər niyyətlər xeyir olsun a dostlar !

Qar əriyir, sellər axır , lillənir
Dağda çəmən , düzdə çiçək güllənir.
İçimdə bir sısqa bulaq dillənir
Arzu- murad deyir olsun a dostlar !
Hər niyyətlər xeyir olsun a dostlar !