ÇAŞIB, YAR GÖZÜNƏ “YASƏMƏN” DEDİM...

Vahid Əziz – 80

Dost sədaqəti: Professor Vidadi Orucov təqdim edir


Çiçəklə sözümüz tutmadı yenə
birini o dedi, birin mən dedim,
düşdü Ay işığı kipriklərinə,
çaşıb, yar gözünə “Yasəmən” – dedim,

Alova bürünüb çatdı qaşların,
o vaxt sonlarıydı zərif baharın,
ətrini duyanda ipək saçların,
bilmirəm, “yaranıb, nə güldən”– dedim?

Gözlərin zillədi göylərə sarı,
orda – leylək köçü, durna qatarı,
qaldı görüşümüz yarımçıq, yarı;
“Çoxmu salacaqsan saça dən?” – dedim,

Bilmirəm – yanlışmı, düzmü əməlim?
Anladım – biryolluq üzülür əlim,
hikkəsi, qəzəbi çılğın gözəlin,
keçməz boğazından kişiliyimin;
odur ki, son sözü yenə mən dedim,
öpüb, sevə-sevə – “Küsəyən” – dedim...

Vahid Əziz
Xalq şairi
11.02.2023