Sizin reklam burada
Sizin reklam burada
  • Oruc Dadaşi Elman


    Oruc Dadaşi Elman

    Təbriz şəhəri

    NƏFƏSİMDƏ

    Biliyə can atır, sayılmaq üçün
    Sayısı bəllənən, on nəfəsimdə
    Günəşə qovuşub ayılmaq üçün
    Gözəllik geyinir don nəfəsimdə

    Sağlamı olduqca, sonsuz öyünən
    Qanadlı quş kimin uçur göyunən
    Sevgidən çırpınıb, qəmdən döyünən
    Hər anda dəyışır ton nəfəsimdə

    Könlümü dinləyib, səsimi duyan
    Canımda yaşayıb, canımda uyan
    Gözlərin - gözlərim içində yuyan
    Duyğu tək qanad aç qon nəfəsimdə

    Nisgilin yas olub, tutub könlümü
    Görkəmin kas olub, tutub könlümü
    Qəm - kədər pas olub, tutub könlümü
    Günəş ol bunları yon nəfəsimdə

    Qədrimi indi bil, qəlbimi oxu
    Könlündə sevgimə bir yuva toxu
    Gəl vurma Elmana, ayrılıq oxu
    Nəyimə gərəksən son nəfəsimdə

    YERİN VAR

    Yaqut dənəli nar kimi könlümdə yerin var
    Eşqin bağısan bar kimi könlümdə yerin var

    Bir kimsə tapılmaz, məni qəmdən uzaq etsin
    Sənsiz çəkilən car kimi könlümdə yerin var

    Arzum dolanan dağları qarşımda unutma
    Ol zirvədə ki qar kimi könlümdə yerin var

    Həsrətdə saralmış baxışımdan bahar umma
    Sən, güllərə oxşar kimi könlümdə yerin var

    Hicranda tutulmuş boğazımdan neyi dinlə
    Amma sən özün tar kimi könlümdə yerin var

    Göynətdi göyərçin qanadın atdığın oxlar
    Sındırma kı ilqar kimi könlümdə yerin var

    Yalvarmadıyam, gəl qapılardan yığışım mən
    Bilsin hamılar, var kimi könlümdə yerin var

    Sevdam yazılan yerdə qələm, oldu qızıldan
    Elmandı bilən yar kimi könlümdə yerin var

    EŞQÜ İMAN

    Xilqətin nəzmində ki tək beyti imandır Əli
    Bayi bismillah ləbindən səsli Qurandır Əli

    Eşqsiz iman gərəkməz, eşqü iman birliyi
    Cami vəhdətdən gələn, düz əhdü peymandır Əli

    K'əbədir eşqin adından, qiblədir aşiqlərə
    Can desəm azdır yəqin, canlarda canandır Əli

    Oldu dəryalər üzündə rəhnima Cəbrailə
    Bildi aləm, xilqətin dərsində ümmandır Əli

    La fəta illa Əli haqqın dilindən söylənib
    Aşıkara mədh olunmuş haq deyən candır Əli

    Hər kimin qəlbində vardır zərrəcə hübbi Əli
    Anlayıbdır innəma təxtində sultandır Əli

    "Ya" deyən canlarda iman "Hu" dəmindən bəslənir
    La meyin illa edən məktəbdə irfandır Əli

    Kim Əli eşqində öz könlün Gülüstan saxlayır
    Hər zaman sönməz günəş tək orda tabandır Əli

    Hər kimin könlümdə Mövla kəlməsi cövlan edir
    Haq məhəbbət badəsindən dildə mehmandır Əli

    K'əbəsiz qiblə tanınmaz, qibləsiz heç bir namaz
    K'əbədir can qibləsi, haqdan nümayandır Əli

    Şiri haq, meyraci rəbbülaləmin, həqqülyəqin
    Ürvətülvusqa, yədüllah, şahi mərdandır Əli

    Mürtəza eşqi əzanda səslənir xəyrüləməl
    Məsnədindən bəllidir, haq şanlı fərmandır Əli

    Haq deyib mövla deyənlər qəlbinin müştaqiyəm
    Elmanam dərdim məhəbbət, təkcə dərmandır Əli

    • Sosial şəbəkədə paylaş
    XƏBƏR LENTİ