Agah Xaçmazlı

Düşüb əldən şüşə kimi arzular,
Hamı oldu qırıq-qırıq, gəlmədi.
Bu dünyanı ayaqyalın dolandım
Ayağıma bircə çarıq gəlmədi.

Bu bəxtimə saxladığım kin deyil.
Üç arzum var, o yüz deyil, min deyil.
Yəqin bilib arzularım çin deyil,
Ona görə qızıl balıq gəlmədi.

Bəxtim hanı bəxt torbasın büzməyə ?!...
Gücüm yox ki, o torbanan gəzməyə.
Bu torpaqdan ayağımı üzməyə,
Dalğalarla üzən qayıq gəlmədi.

"Kabab dadın çiy ət alıbdı közdə.
Yanan qabıq sürmə olubdu gözdə."
(Gülüşləri çox sevirəm hər üzdə,
Gülənlərlə güldüm, acıq gəlmədi.)