Milli Hidrometeorologiya Xidmətindən bildirilib ki, şimal-qərb küləyi əsib, küləyin maksimal sürəti Bakıda və Abşeron yarımadasında 20, Culfada 19, Şahbuzda 16 m/s-yə çatıb.

Havanın maksimal temperaturu Bakıda və Abşeron yarımadasında 33, Naxçıvan MR-da 34, Aran rayonlarında 37, dağlıq rayonlarda isə 24 dərəcəyədək isti müşahidə olunub.

Dövlət Ekoloji Təhlükəsizlik Xidmətinin əməkdaşları tərəfindən son bir həftə ərzində keçirilən nəzarət tədbirləri zamanı Bakı, Gəncə şəhərləri və Quba rayonu ərazisində ağacların qanunsuz kəsilməsi faktları aşkar olunub.

Bu barədə Dövlət Ekoloji Təhlükəsizlik Xidmətindən məlumat verilib.

Bildirilib ki, araşdırma zamanı Bakı şəhəri Sabunçu rayonu Bakıxanov qəsəbəsi Ülvi Rəcəb küçəsi, Binəqədi rayonu Biləcəri qəsəbəsi Asəf Zeynallı küçəsi, Binəqədi rayonu 7-ci mikrorayon İlham Hacıyev küçəsi, Gəncə şəhəri Nağı bəy Şeyxzamanlı küçəsi, Quba şəhəri və Quba rayonunun Qəçrəş kəndi ərazisində ağacların qanunsuz kəsilməsi nəticəsində yaşıllıqlara 81 min 820 manat məbləğində ziyan dəydiyi müəyyən edilib.

Hər bir fakt üzrə yaşıllıqlara dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış materiallar hüquq-mühafizə orqanlarına göndərilib.

Daxili İşlər Nazirliyinin (DİN) Su Nəqliyyatında Polis İdarəsi Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətindən daxil olmuş müraciətlər əsasında su hövzələrində qanunvericiliyin tələblərinə riayət olunmasına nəzarət məqsədilə müvafiq tədbirlər həyata keçirib.

Bu barədə DİN-in mətbuat xidmətindən məlumat verilib.

Bildirildiyinə görə, araşdırmalarla müəyyən edilib ki, Xəzər rayonunun Buzovna qəsəbəsi, Suraxanı rayonunun Bülbülə qəsəbəsi, Abşeron rayonunun Məmmədli kəndi ərazisində yerləşən göllərdə, həmçinin Goranboy rayonunun Yuxarı Ağcakənd qəsəbəsi ərazisində - Qaraçayın sahilində və Balakən rayonunda - Dəliçayın ərazisində su qanunvericiliyinin tələblərinin pozulması halları aşkarlanıb.

Belə ki, qeyd edilən su hövzələrinin tikinti-söküntü tullantıları, məişət tullantıları, bərk və qarışıq süxurlarla qanunsuz doldurulması, həmin ərazilərin akvatoriyasına torpaq və digər materialların gətirilərək tökülməsi, habelə sahilboyu mühafizə zolağında torpaq-qazıntı işlərinin aparılması halları müəyyən edilib. Eyni zamanda, su hövzələrində icazəsiz qazıntı işlərinin aparılması nəticəsində yerin relyefinin dəyişdirilməsi və hidroloji rejimin pozulmasına səbəb olan hallar aşkarlanıb.

Qeyd edilən faktlarla bağlı Cinayət Məcəlləsinin müvafiq maddəsi ilə cinayət işləri başlanılıb. Hazırda faktların hüquqi qiymətləndirilməsi məqsədilə zəruri istintaq tədbirləri davam etdirilir.

Bu fikirləri jurnalistlərə açıqlamasında BMT-nin İnsan Hüquqları Şurasının Afrika Mənşəli Xalqlar üzrə İşçi Qrupunun eksperti, Afrika Reparasiyalar Mərkəzinin (Africa Reparation Hub) təsisçisi, fəlsəfə doktoru Catherine Stella Namakula avqustun 21-də Bakı Təşəbbüs Qrupunun təşkilatçılığı ilə Bakıda keçirilən “Belçika müstəmləkəçiliyinin ədalətsizlikləri və təzminat mübarizəsinin 101 ili” mövzusunda beynəlxalq konfransda çıxışı zamanı bildirib.

C.Namakula qeyd edib ki, Bakıda keçirilən konfrans təkcə Belçikanın Konqo Demokratik Respublikasındakı müstəmləkəçilik siyasətinin fəsadlarının müzakirəsi ilə mahdudlaşmır, eyni zamanda, Afrika mənşəli xalqların qlobal miqyasda təzminat tələbləri baxımından da böyük əhəmiyyət kəsb edir.

“Biz hazırda Afrika mənşəli xalqlar üçün BMT-nin ikinci Beynəlxalq Onilliyinin başlanğıcındayıq. Bu mərhələdə əsas məsələlərdən biri reparasiya ilə bağlı beynəlxalq standartların müəyyənləşdirilməsidir. Hazırda Afrika mənşəli xalqların insan hüquqları ilə bağlı Bəyannamə çərçivəsində reparasiya məsələsinə dair standartların formalaşdırılması mühüm müzakirə mövzusudur.

Ümid edirik ki, reparasiya məsələlərinə baxılması üçün ayrıca institusional çərçivə yaradıla bilər. Ukrayna ilə bağlı reparasiya məsələsində belə bir mexanizmin yaradılması tövsiyə olunub. Eyni yanaşmanın bu mühüm məsələyə də tətbiq edilərək BMT səviyyəsində xüsusi institutun formalaşdırılması reparasiya məsələsinə daha sistemli və məqsədyönlü diqqət yetirməyə imkan verər”, – deyə C.Namakula diqqətə çatdırıb.

Ekspert bildirib ki, Afrika İttifaqı səviyyəsində artıq reparasiya məsələləri üzrə ekspertlər komitəsi fəaliyyət göstərir.

“Hazırda Afrika İttifaqı çərçivəsində reparasiyalar üzrə ekspertlər komitəsi mövcuddur. Bunun BMT səviyyəsində də oxşar mexanizmlə tamamlanması beynəlxalq standartların formalaşdırılması baxımından mühüm addım olardı”, – deyə o qeyd edib.

C.Namakula Bakıda keçirilən beynəlxalq konfransın əhəmiyyətini də yüksək qiymətləndirib: “Bu, həqiqətən də çox mühüm konfransdır. Burada müxtəlif ölkələrdən çoxsaylı ekspertlər və yüksək səviyyəli diplomatlar iştirak edirlər. Onlar zərər çəkmiş ölkələrin mövqelərinin və səslərinin daha geniş şəkildə eşidilməsinə, eləcə də bu məsələlərin həlli üçün real addımların atılmasına töhfə verirlər”.

O əlavə edib ki, konfrans yalnız fikir mübadiləsi aparmaq üçün deyil, həm də beynəlxalq ictimaiyyəti konkret fəaliyyətə çağırmaq baxımından əhəmiyyətlidir.

“Bu tədbir həm bizim özümüzə, həm də dünyadakı digər aktorlara fəaliyyətə çağırışdır. Hesab edirəm ki, burada aparılan müzakirələr reparasiya məsələsinin beynəlxalq gündəmdə daha geniş yer almasına mühüm töhfə verəcək”, - deyə C.Namakula əlavə edib.

Azərbaycan Respublikasının Qida Təhlükəsizliyi Agentliyi (AQTA) və Polşa Respublikasının Baş Baytarlıq Müfəttişliyinin nümayəndələri arasında heyvanların identifikasiyası və qeydiyyatı sistemlərinə dair onlayn görüş keçirilib.

Agentliyin İnformasiya təminatı və innovativ həllər şöbəsindən verilən məlumata görə, görüşdə heyvanların fərdi identifikasiyasının onların hərəkətinin və sağlamlıq vəziyyətinin izlənilməsində, baytarlıq və epizootoloji nəzarətin effektivliyinin artırılmasında əhəmiyyəti qeyd edilib.

Müzakirələr zamanı identifikasiya və qeydiyyat sistemlərinə riayət olunmasına nəzarət, uyğunluğun monitorinqi və bu sahədə hüquqi mexanizmlərin tətbiqi məsələlərinə də toxunulub. Həmçinin fermerlər və digər sistem istifadəçilərinin prosesə cəlb olunması və identifikasiya tələblərinə əməl etmələrinin təşviqi ilə bağlı yanaşmalar diqqətə çatdırılıb.

Bu sahədə Polşa təcrübəsinin öyrənilməsinin, müasir yanaşmaların tətbiqinin və qarşılıqlı təcrübə mübadiləsinin bu istiqamətdə fəaliyyətin təkmilləşdirilməsinə töhfə verəcəyi vurğulanıb.

Cari ilin yanvar–iyul ayları ərzində 24,6 min nəfərə proaktiv qaydada yaşa, əlilliyə və ailə başçısını itirməyə görə pensiya təyinatı aparılıb.

Bu barədə Dövlət Sosial Müdafiə Fondundan məlumat verilib.

Bildirilib ki, onların 56,8 faizini kişilər, 43,2 faizini isə qadınlar təşkil edib.